樓市出更：政府批則年尾狂跑數

政府話過會加快審批圖則催谷供應，劉Sir知道最近有唔少市區舊樓重建項目獲批圖則，屋宇署公布十月份批出17份圖則，涉及8項住宅及商住發展，好似恒地（00012）嘅鴨脷洲大街62至72號舊樓重建，就准重建1幢28層高商住樓；而金朝陽（00878）亦有北角及西半山重建項目獲批則。

睇番屋宇署最新數據，十月共批出17份建築圖則，當中住宅及商住圖則佔8份，按月多約1.7倍，好似上述恒地鴨脷洲大街住宅重建項目，就准建1幢28層高商住樓，總樓面約4.95萬方呎，住用樓面佔約4.85萬方呎，恒地今年四月先透過強拍統一業權，當時提過會起約60個中小型單位。

而金朝陽都有兩個港島重建項目獲批則，上述西半山摩羅廟街14至18號批建1幢27層高商住物業，總樓面大約4.96萬方呎，住用樓面就佔約4.4萬方呎；旗下北角建華街57號及堡壘街66號亦批建1幢1層商業樓宇及1幢28層高分層住宅。

億京天水圍批建酒店

至於期內6個商業項目獲批圖則，數到規模最大係億京發展今年三月投得嘅天水圍108A區項目，屋宇署批准喺1層地庫之上起1幢21層高酒店，總樓面約27.99萬方呎，呢個仲係億京發展第一個酒店項目。

私宅落成量達標無望

至於私宅動工數字再創新高，雖然十月僅300伙私宅動工，比九月減約73%，但頭十個月加埋動工量已有12,708伙，創近五年新高，估計全年動工量有1.8萬伙。但十月落成量僅717伙落成，按月減近75%，今年累積落成6,845伙，比政府預測11,888伙仲差5,000伙，睇怕今年達標無望，有代理老友估全年數字約8,800伙。

另部分落成住宅項目公布發水摘要，其中九建（00034）九龍景怡峯整體發水比例62.679%。