股海實戰：冠捷升浪方興未艾

眨眼又到十二月，近期內房股炒風都有啲同首季類似，上周五炒到去二、三線嘅沿海家園（01124）同人和商業（01387），照計隻恒大（03333）好值得關注，雖然現價要升三成先至能夠去番五十二周高5.03元，但唔貪心，博佢上番4.5元都唔差，不妨留意呢個禮拜班對沖基金做唔做嘢！

A股繼續尋底，截至上周二，上海A股及滬深300嘅市盈率同為9倍多，較○八年低位時二者嘅市盈率約13至14倍還要低。愈平愈冇人買，愈貴愈有人搶，正係魚缸特色，但咁亦說明目前正係長線投資者入市嘅大好時候，但要補充一句，分注收集宜從擁行業龍頭地位嘅大市值股份入手，事關通常喺大跌市尾段中小型股係跌得最甘，千祈咪表錯情！

業務復甦動力增強

冠捷（00903）公布首九個月業績，雖然純利跌5%至7,546萬美元，但若單以第三季計算，季內純利達3,124萬美元，同比增長2.1倍，亦相等於首九個月純利嘅41%，反映業務復甦動力正在增強，難怪上周五股價備受追捧，高位曾見2元，收報1.98元，升15%，成交4,480萬元。

單睇第三季，公司錄得收入32億美元，同比增長12.9%，毛利率上升兩個百分點至8%。季內公司付運的監視器同比減少2.8%至1,470萬台，毛利率降0.7個百分點至6.6%，但以量計算，表現優於市場；另期內之液晶電視（包括TP Vision）付運量按年上升20.5%至390萬台，而毛利率由4.5%上升至10.2%，表現良好。業績報告表明，雖然經濟前景未明，但基於現時嘅訂單數量，公司對實現全年付運量目標審慎樂觀。

基於預期第三季嘅良好勢頭可於第四季持續，相信冠捷全年度業績會較市場原先估計嘅好，即使保守地以去年度純利（1.2億美元）再打八折計算，現價預測市盈率僅6倍，加埋有五厘息，估值具吸引力。估計由季度業績引發市場重估嘅升浪剛開始，短線回吐守穩1.9元水平有得諗，是浪目標反覆上試2.35元。