樓市出更：佐敦奀地財團謀住搶

上個星期將軍澳有地皮以「癲價」售出，令市場大跌眼鏡，所以今個星期五截標嘅兩幅住宅地，其中將軍澳第68A1區限量地料再成焦點，部分測量師已主動將估值調升至每方呎約4,900元，現時上限價約21.2億元；但劉Sir知道，其實業界都覺得佐敦官涌街「迷你」住宅地會搶得「激啲」，因為涉及金額細，加上係市區地皮，估值最高約莫2.1億元。

將軍澳南已有多幅限量地先後批出，基本上可以話「一幅貴過一幅」。

將軍澳地料每呎4930元

好似上個星期以28.26億元批出嘅第68A2區限量地，每方呎樓面地價4,929元，創咗將軍澳賣地呎價新高，嚟緊星期五截標嘅第68A1區限量地，位置喺正隔籬，所以有測量師老友調升該地估值。

高緯環球張翹楚同劉Sir講，將軍澳第68A2區啱啱以高價批出，故以此作為基準，調升第68A1區限量地估值，由每方呎約4,700元，調升約4.3%至約4,900元。

佢又講到，由於剛以高價投得68A2區地皮嘅財團較少參與政府賣地，同時未必會再以高價搶地，所以今次地皮最終嘅成交呎價維持約4,700元水平都唔奇，即係同區內其他已售土地嘅地價相若。至於中原都調升咗地皮估值約9.6%至21.2億元，每方呎樓面地價約4,930元，係市場上限價。

佐敦「迷你」地料值1.7億

至於佐敦官涌街地皮規模細，校網同交通配套又夠完善，劉Sir相信地皮將受各類財團追捧，張翹楚都話，該幅市區「迷你」地皮估計成交價約1.7億元，每方呎樓面地價約6,500元，該項目涉資唔多，估計競投情況會「激烈好多」，日後開售呎價必然過萬。

呢幅佐敦地皮以油麻地翠匯軒單幢式住宅較具參考價值，不過該盤只提供大約60幾個單位，今年二手買賣都仲未發市；劉Sir知道，該盤依家嘅買賣放盤，每方呎叫價約8,500元至1萬元。而同屬單幢樓嘅佐敦德成軒，最近成交呎價就約9,000元至1萬元水平。