市場徐想：DYNAM業績表現對辦

呢期新股尾班車令Prof. J諗番起八月上市嘅日本彈珠機遊戲館營運商DYNAM JAPAN（06889）。

DYNAM作為彈珠機大哥大，之前公布咗上市後首份中期業績，純利增25%至9.27億元，總投注則按年增5.1%至465億元，而期內公司總派彩也較去年同期增加5.7%，至383.29億元，並將派中期股息5.75日圓。如果用現價計，半年息率都大約有4厘。

其實彈珠機都係博彩業務之一，Prof. J就未見過做莊最後會輸錢嘅。所以成日都話企業若要成功，必先要有一個生意模式（business model）。彈珠機營運商最重要就係有部彈珠機同客，係一個好容易複製嘅系統，有錢開愈多分店愈好。所以DYNAM都話希望將來透過自然增長同收購合併，十年內將市佔率增加到10%。如果成功達標，即係集團嘅彈珠遊戲館數會由目前356間變到1,000間。

DYNAM成功喺香港上市後，有風吹出嚟話日本另外兩大彈珠機遊戲館營運商亦想效法。因為日本經濟仍然無起色，企業都想走出去集資。如果係堅料，咁DYNAM就有機成為影子股。