Fundman睇市：味千補倉格

相信全球證監官員之中，最似推銷員的，必數中證監主席郭樹清，幾乎每次有他的報道，都附送傳媒引述，他強調A股有幾抵買。日前財經年會中，臨散場前郭總都不忘補一句「對市場充滿信心」。可惜是，看來對滬深兩地股市有信心的，就只得郭總一個人，昨滬綜指又再創四年新低，跌至1,963點。

期指結算日，港股收市升213點，報21,922點，主板成交544億，是近三星期最多。收市後，金管局兩度入市干預港匯，合共58億元，下星期一銀行體系結餘因此升至1,897.9億。

假如十二月二十一日唔係世界末日，今年仲有二十個交易日，進入傳統聖誕前低成交期，在港匯熱錢極為充裕，今年「包晒頭」的基金，有相當多粉飾業績的誘因，故此唔能夠抹煞大市乾升的可能，就算口淡淡唔信邪，大家短期仲係避免做空軍為宜。

珠寶股六福（00590）半年賺5.58億元跌22.4%，營業額則升7.4%至59.2億，收入升利潤跌，緣於鑽石首飾毛利率回復到一○年的「正常」水平，毛利率下降2.9個百分點至21.6%，整體上業績較市預期好。按年報顯示，下半年聖誕及新年乃珠寶首飾銷售旺季，過去三年佔全年盈利65%、63%及46%（主要是金價回落影響），全年賺12億的預測可能有點保守，一三年PE 11倍樓下，昨日抽升後現價仲係吸引。

翠華影子效應帶動

招股定價進取的翠華（01314），影子股效應帶起兩隻快餐股，火燒冷灶，就連久沉的味千（00538）都被炒高，尋日抽升0.97元，報6.97元，乜仇都報晒。

豬骨湯事件之後，味千股價沉寂多時，今年累積跌17.4%，早前的第三季同店銷售報告，香港及內地分別得0.5%及2.3%增長，銷售收入升12.4%，豬骨湯事件加上內地反日情緒高漲，味千已經打定輸數，今年店舖數目維持一一年的670間左右，不求大變。睇番大行估味千今、明兩年分別賺1.42億及2.23億（一三年32倍PE），加埋都唔夠一○年高峰期的4.47億，難怪高盛鬼咁淡，喊沽不特止，仲睇到2.7元咁低。

按基本因素，無乜理由揀味千，唯一解釋係自三月以來味千沽空比例持續高企，尋日咁掃法，十足十補倉格局，若然係年初被綁者，應趁機換貨。