樓市出更：內地用家孭稅焗撐

買家印花稅（BSD）推出至今，市場已錄唔少同類成交，劉Sir知道沙田第一城剛錄屋苑首宗BSD成交，成交價300多萬元，而且仲係罕見嘅「雙重印花稅」買賣，新買家係內地人，購入單位畀子女在港升學時居住。美聯集團（01200）張錦成（Victor）亦話，BSD滿月，內地客嚟香港睇樓多番少少，比起剛剛出招頭一個禮拜回升1成。

呢單沙田第一城首宗BSD，據中原黎宗文同劉Sir講，沙田第一城36座一個高層D室，面積約389方呎，獲內地人以309萬元買入，呎價7,943元。

內資港睇樓跌至半成

據了解，該單位有企理裝修，可以即買即住，同時新買家認為大型屋苑升值潛力高，更加可以準備為子女在港升學時居住，遂願付樓價15%BSD稅款，即約46.35萬元入市。

至於原業主就喺舊年九月以240萬元買入，揸咗一年多啲，所以要畀5%嘅SSD稅項，大約15.45萬元，不過扣除SSD，帳面都賺約53.55萬元。

另外，以往都有帶內地富豪大款嚟香港買樓嘅美聯，其集團執行董事兼中國部行政總裁張錦成（Victor）同劉Sir講，政府推出BSD後一個月，雖然內地客嚟香港睇樓多番少少，比起剛剛出招頭一個星期嗰陣，輕微回升1成，但係同出招前比較，仍然少咗7成客，而成交量就「無起色」，仲係維持響出招前下跌逾9成嘅慘淡水平。

如果細心分析睇樓客源分布，Victor話，投資客嘅轉變就最明顯，事關香港政府出呢個雙辣招，唔多唔少都係睇準非香港永久居民嘅內地投資者，出招前呢批客嘅睇樓比例佔約莫三成，政府出招初期都仲有一成左右嚟香港睇樓，家陣滿月，內地豪客諗清諗楚後，計劃嚟香港買樓投資嘅睇樓客跌到得番唔夠百分之五。

深港樓價差幅擴大

美聯中國營運總監兼華南區董事王書權就話，BSD令內地人嚟香港買樓既折扣優惠變相消失，加上深圳樓價呢年都穩定好多，而香港樓係咁升，深、港兩地樓價差幅已經擴大至一點二倍，創六十八個月嘅新高，所以政府推出BSD後，好多內地投資者都轉呔。