股海實戰：億和留意收集機會

內地股市毫無反彈之力，恒指跌逾百點，但內房股就逆市走強，多隻創五十二周新高，皆因本周二上海同北京都出咗「地王」。年尾房企積極買地，可能係今年太過保守，到年尾才加快增購土儲有關，但業界應該清楚上大人嘅底線，見好要識收，免得再惹阿爺出手。

今日期指結算，喺人保（01339）IPO活動凍結市場大量資金之下，唔排除恒指短線或須下試10日線21,535點支持。新加坡金管局警告，目前企業債務處於歷史高位，一旦經濟再度轉差或利率上升，可能會影響當地銀行業嘅貸款質素。

銀行貸款質素響警號

其實香港何嘗唔係？低息環境不正常地不斷延續，企業生意難做，惟有借平錢炒賣搵快錢，本來早應被淘汰嘅企業依然存在，銀行貸款質素惡化在所難免。難怪連術數專家朋友都話，一三年投資市場都係平平穩穩，真正危機喺一四年，即係美國低息周期告終之時！

前日推介嘅中國全通（00633），尋日回落咗2%，阿莊遂以平均價1.87元買入8萬股，會再睇位增持。此外，見隻中國燃氣（00384）飛甩雞毛，心思思想翻兜隻昆侖能源（00135），呢兩日會睇位先買首注。

專做辦公室自助化設備業務嘅億和（00838），一○年度賺3億元，一○年底股價曾高見4.155元（還原一送一紅股價格為8.31元），公司把握機會喺一一年三月配股集資2.95億元。結果一一年度純利倒退至2.1億元，今年上半年純利進一步降至只有四千萬元，理由係辦公室自動化設備業務客戶轉攻低端新興市場，致毛利率下降，加上為改善過於依賴單一業務風險，公司早喺○九年已開始進行策略性業務轉型，喺武漢起廠拓展汽車零部件市場，但新廠投資前期費用亦拖低了今年嘅業績表現。

不過，武漢嘅廠房將於明年竣工，有望步入收成期，而辦公室自助化設備業務亦有望走出周期性低潮。今年二月阿莊亦曾推介過億和，食咗個反彈浪。綜觀下半年股價已觸底，尋日大成交重上1元樓上，仍然覺得呢隻工業股可中長線持有，相信喺250日線1.14元前會有回吐，1元邊或樓下可留意收集機會。