樓市出更：辣招滿月商廈贏通街

政府早排向住宅市場雙倍落藥，事隔約一個月，住宅市場買賣靜晒，不過工商舖成交就大放異彩，睇番代理嘅資料，措施後商廈買賣價、量齊升，期內錄得約222宗成交，較措施前一個月多30%，總額達約23.4億元，升幅更達49%，兩數字升幅都係咁多類物業中最好，其中以灣仔區商廈成交最熾熱，比起措施前多咗超過1倍。

劉Sir喺美聯工商舖等市場資料發現，截至今個月二十六號，上述措施後整體工商舖買賣成交約1,185宗，比起措施前同期多近22%，期內總額約97.2億元，較之前同期亦增加近10%。

成交增49% 乙廈旺市

其中以商廈最多人捧場，措施後商廈買賣共錄約222宗買賣，總額約23.4億元，較措施前分別多出30%及49%。期內灣仔區成交最理想，錄得近50宗買賣，當中不少為乙級商廈，包括金威商業大廈及佳誠大廈等。

中價舖交投佔八成

除商廈外，工業物業人氣亦唔弱，據美聯工商舖等資料，措施後工業物業買賣約622宗，總額約31.9億元，兩數字比起措施前各增約21%及29%。其中，單係億京發展期內已速售荃灣海盛路3號逾百個貨尾單位，部分新買家更即買即放摸貨，叫價一般提高約15%。

至於期內店舖就旺市，未旺價，據資料睇到，措施後店舖買賣約341宗，較措施前係升約18%，不過，期內總額約41.9億元，比之前同期少約13%。原來响過去一個月，市場錄得店舖買賣成交中，金額少過半億嘅個案高佔整體達約80%，例如，張姓投資者期內掃入嘅逾10項目商舖物業，大部分均為二、三千萬元中價舖。

美聯工商舖行政總裁黃漢成話，政府上個月推出兩項調控樓市措施，無疑會增強部分住宅投資者，分散資金買工商舖物業信心。

不過該行資料睇到，情況暫未見十分顯著，原因相信係工商舖投入資金較住宅大，加上揀選合適物業須具相當經驗，但喺低息環境持續下，工商舖成交可望繼續向上。