魚缸Blogger：歐舒丹強勢可跟進
十二月都未到，各大護膚品牌已搶閘推出聖誕禮盒，「來路貨」歐舒丹（00973）一盒身體護理套裝叫價八舊水都有人買，而尋日股價亦再創歷史新高，並以近全日高位25.6元收市，升逾半成，食正旺季跟炒無蝕底。
歐舒丹上半年純利增長逾一成半，暴炒妹上月推介呢隻股時睇24.45元，博佢可以突破此歷史高位，眨吓眼已經成功兩度破位，連花旗都出報告首次叫人買，話公司明年基本增長佳之餘，仲積極打入高增長市場如金磚四國等，銷售淨額話唔定會翻一番，建議如果股價出現回吐時可趁低吸納。
睇番幅圖，股價處於八月延伸至今的上升軌，昨更以大陽燭升穿十月中旬高位25元，短線回吐守10日線24蚊可收集，博佢破頂見26個半。
歐舒丹（00973）
阻力位：26.5元
支持位：24.0元