股海實戰：中國建築睇位食胡

港股再一次喺22,000點前卻步，尋日恒指見高位22,002點後回落，一度倒跌41點，收報21,844點，跌17點，成交496億元。尋日仲講緊下月中央經濟工作會議召開前A股或繼續按兵不動，點知嗰頭滬綜指就被質穿2,000點心理關口，低位見1,990點，創○九年一月中旬以來新低。顯然，如今內地A股市場缺乏承接力，即使估值已回落至相對合理嘅水平，但喺魚缸人氣低迷之下，指數難以苦撐，只有繼續尋底。由於臨近年尾企業資金周轉緊張，若然短線未能迅即收復兩千點大關，提防會引發更大沽壓，真係咪話唔閉翳！

事實上，今年A股股民大部分都要損手，表叔們聽到「股票」兩個字都怕怕！阿莊深信，從長線角度睇，目前A股估值已具吸引力，依家入市肯定係低位，問題係大家要明白，目前魚缸正承受四萬億人仔救市所帶來嘅負作用，阿莊寧願繼續由市場自行調整，只要經濟結構調整成功，唔怕冇翻身日，若然呢個關鍵時刻官方又再出招打亂市場自行調節機制，咁只怕會令調整時間為時更長。

中燃後悔沽得太早

此外，呢期股價升唔停嘅中國燃氣（00384），原來上周三獲南韓SK增持，主要股東喺公司公布業績前買貨，係咪預示有好消息，不得而知，阿莊只恨早前沽咗呢隻股買唔番，真係肉痛！好在組合仲有隻安東油服（03337），尋日高位見3.01元，前日已預告上到3元關可睇位食胡，遂以平均價3元沽出10萬股，五萬銀利潤袋袋平安。順帶一提，組合持有嘅波司登（03998）將於今日宣布中績，睇吓份成績表點樣再定去留。

七月阿莊推介過嘅中國建築（03311），股價已由當時嘅7.2元水平，升到上五十二周高位見9.7元，尋日收9.61元，升0.4%。當時主要睇好兩地大量基建陸續啟動，加上兩地政府積極增加公營房屋及保障房嘅供應，均能為中建築帶來商機，而早前公司成功配股集資，亦有助加快擴展市場步伐。事實上，公司首十個月新簽合約金額已提前實現全年目標，難怪自推介短短四個多月，股價經已累升三成有多，做佢股東真係飲得杯落！

不過，以現價往績市盈率回升至21倍，今年預測市盈率約17倍，估值已唔算係特別便宜，加上見到14日RSI現背馳，故建議持貨者可趁股價向10元關推進，把握機會逢高減磅，等明年首季公布年度業績前再睇位翻兜。