樓市出更：東莞舖港吸金值近億

年內賣樓套現達8.8億元嘅宏安地產，最快要到明年先有新盤開賣，但鑑於市場資金充裕，加上近年舖位投資大熱，佢哋睇準機會喺本港推售旗下東莞綜合項目其中22個街舖物業，面積由495方呎起，入場費150餘萬元人民幣。

發展商同劉Sir講，西營盤嘅薈臻，今年已經賣咗81伙，套現約5.3億元，平均呎價約1.48萬元，剩番16伙打算等一五年現樓先賣，如連同全數103伙沽清嘅紅磡薈點，年內賣樓收益共8.8億元，最快要到明年農曆新年後，先會推出長沙灣營盤街單幢新盤，該盤涉約84伙，主打面積約400方呎嘅一房單位。

22街舖 入場150萬

雖然年內無新樓賣，不過市場熱錢氾濫，同系PNG資源（00221）旗下東莞金億利房地產發展嘅東莞大嶺山「領尚天地．領尚坊」，就把握時機吸引本港投資者，委託代理推出22個街舖，總值約7,000萬元（人民幣．下同）。

宏安地產黃耀雄仲話，近年投資商舖係唔少投資者嘅資金出路，市場資金充裕，加上人民幣又不斷升值，前景甚為看俏，再者，內地過去針對住宅推出嘅調控措施，令唔少資金流入商業物業，令呢類物業錄得可觀嘅升幅。

而該項目係屬於一個大型綜合項目，包括住宅、商舖及商場等，投資額近7億元，而該批舖位面積由495方呎起，一般標準單位介乎800至900方呎，門面闊14至21呎，可以打通組合成巨舖，售價由150萬餘萬元起，平均呎價約3,000元。

租金回報料5厘

佢話，港人可以直接投資東莞商舖，唔受限購、限外措施規限，近日更獲大型銀行預留購入約9個舖位作地區總行，涉及面積約6,000方呎，而且鄰近設有大型購物商場，每方米租值料介乎200至500元，相信租金回報率可有5厘。

至於該東莞項目嘅住宅部分，過去已賣咗約500個單位，以當地買家為主，並已開始陸續入伙，而上述街舖亦快將落成。另首十名透過展銷會購買舖位，以及即供付款，分別可享5%折扣。