牛熊對壘：兗煤受惠國策吼18960

上周五美股做好，港股昨日借勢高開73點後迅即回軟，即市動力有限，二萬二可望而不可及，收市倒跌52點，報21,861點。

昨日的調整，其實都唔係好意外，因上周累升逾700點，成交無突破，昨日調整幅度唔多，即月期指跌51點，高水21點，形態未算好差。牛熊證成交54.92億元，其實除前周二成交一度飆上80億元之上外，成交平均都係得50、60億元，佔比約12至13%，股友買賣牛熊證的意欲唔強。

昨日有8隻恒指熊證被強制收回，街貨唔到1億份，相當於184張對沖期指。十一月以來，共有158隻恒熊被劏，被收街貨34.6億份，同期136隻恒牛被屠，32.9億份街貨收回。恒指今個月最高見22,150點，最低是21,098點，數據反映牛熊旗鼓相當，大戶好淡兩邊殺，做邊唔容易。

資金流傾向睇淡

上周埋單，恒牛總街貨約40億份，熊證則接近32億份，大戶殺牛的誘因繼續醞釀，按過去統計，兩者相差近倍時，方向才較明確。而恒指月初二萬二企唔穩而掉頭，今次能否破關成關鍵，從資金流向就睇到股友部署睇淡，恒指輪證淡倉上周五錄得3,026萬元資金流入，好倉流出652萬元資金。其他流入最多資金的倉位包括騰訊（00700）、保利置業（00119）及中石油（00857）好倉，分別流入1,256萬元、366萬元及284萬元。

大市氣候難捉，熊友蠢蠢欲動之際，個別股份卻是炒得非常高興，當中不乏內房股，但該板塊累積升幅不少，要慎防高追風險。

近日有關內地煤業改革的消息紛紜，有指煤炭價格有望明年完全開放、煤企兼併速度勢將加快、煤電重點合同將取消，政策有利大型煤企。兗煤（01171）市值233億元，昨逆市企穩，微升0.3%，兗煤法興購（18960）明年六月十日到期，行使價13.68元，實際槓桿5.4倍。