Fundman睇市：A股快見底

上星期，感恩節後Black Friday，美國零售商銷售賣個滿堂紅，道指勁升兼重返13,000點樓上，不少人對周末假期後復市的港股寄予厚望，可惜最後來個反高潮，恒指高開低收，跌52點收21,861點，主板成交仲比上周五減少44億去到463億，對好友而言，可謂相當掃興。

唔經唔覺，美國總統大選及中國十八大雙雙塵埃落定，但係令到成個中環都係眼鏡碎的A股，卻遲遲未止瀉，滬綜指跌超過年半，由3,000點碌落今日接近2,000點水平，低位到咗未？相信是近期最多人問的問題。單睇安碩A50（02823）較指數溢價拉闊，以及投行QFII額度比早幾個月大減，可見由散戶到基金大戶，唔少已經上齊貨，無奈A股猶如未坐滿十六個乘客的小巴一樣，等極都係唔開車。

瑞銀報告話，A股業績向下修訂周期，持續十八個月，已平了○五年的紀錄。上市公司收入及毛利最壞時刻，預期接近尾聲，業績向上修訂期，估計在明年第二季開始，如果股價跑在業績向上修訂期的一季前，明年第一季會係入市黃金機會。

幾個月以來，筆者見到不少經濟師估算A股上市公司業績轉角點會在何時出現，較樂觀的估今年第四季，查實，由九月初H股見底，國際投資者心目中，這仍然是主流想法。或者A股投資者實太悲觀，在漫長熊市中，要確認季績見底，才肯真金白銀重投股市。筆者另一個指標，是上海A股昨日成交額331億元人民幣，創四年低位，印證要沽貨的已沽得八八九九，刻下可能就只差一份季績，催化A股股民恢復信心。

雅居樂最宜追落後

昨超過十隻內房股創今年新高，中國海外（00688）及潤地（01109）兩隻基金至愛自不然有份。尋日飯局中，有基金經理認為即將公布的十一及十二月賣樓數字，對內房股無關痛癢，近期幾個投行大型中國經濟研討會之後，大孖沙密密吸內房股，大都是賭明年中國政府及人行的樓市壓抑措施會比今年寬鬆，以免增加經濟緊縮過快的風險。

中海及潤地已跑先太多，本來恒大（03333）、龍湖（00960）及雅居樂（03383）都可以列入心水，可惜恒大走勢實在太不「合群」，或者同場外唔少衍生工具影響有關；龍湖受大股東夫婦離異拖累，但反彈後差不多已回到消息前水平；雅居樂首十個月銷售僅達目標七成七，影響股價未有跟升，但相信消息已充分消化，追落後一於揀佢。