股海實戰：全通升勢有餘未盡

港股喺22,000點關前卻步，恒指回落52點收市，報21,861點，成交464億元。一線內房股強勢依舊，頁岩氣同汽車股氣氛亦唔錯，阿莊持有嘅安東油服（03337）曾高見2.93元，收報2.92元，升11%，成交1.62億元，短線上試3元關可以睇位食胡。

尋日滬深兩市主板成交只有627億元人仔，內地用語叫「地量」。中央經濟會議下月召開，市場關注明年內地GDP增速目標。今年政府換屆，會唔會新人士新作風，就要拭目以待，唔排除此前A股投資者繼續按兵不動。

翠華請食奶油豬

港股方面，新股翠華（01314）首日掛牌收報2.56元，較招股價升12.7%，見FB炒友留言，即市炒作翠華賺夠一年每日免費食個奶油豬！

繼續炒股唔炒市，綜合資訊通信應用解決方案及應用服務供應商中國全通（00633）本月上旬宣布，旗下全資附屬廣東全通擬以總代價8.16億元人仔，向中興（00763）買入主要從事研發及產銷移動終端及顯示屏等部件嘅目標集團51%股權，作價相等於一一年度市盈率10.5倍，廣東全通將以內部資源撥付。

同一時間，全通將向中興發行1.1億股新股（每股作價1.8元，設一年禁售），以及發行2.01億元兩年期年息十厘嘅可換股債券（換股價2.2元）。完成後，中興將提名一候選人出任全通嘅非執董。假設交易及配售新股完成，中興將持有全通8.43%股權，成次大股東，若全面行使可換股債，則持股量將增至14.33%。

其實，全通同中興早喺今年七月經已訂立戰略合作框架協議，今次交易作價合理，亦唔排除雙方日後仲有其他合作。難怪見其股價未肯回頭，由上周1.6元水平升到上尋日收報1.93元。翻查資料，其實劉央喺一一年九月全通上市已為其主要股東，但本月初已減持至低於5%。要離場嘅基金經已沽貨，要買貨揸長線嘅大孖沙亦已浮面，照計股價仲有得去。留意短線回吐守1.75元有得諗，下一阻力可參考CB行使價2.2元，不跌穿1.6元可繼續持有。