樓市出更：熱錢圍工廈四叔諗拆售

新辣招推出後，熱錢湧向工商物業，唔少發展商都把握黃金機會，放賣非核心工商項目，有代理話，恒地（00012）或有關公司計劃分層拆售觀塘鴻圖道52號全幢工廈，唔計地廠，單位平均呎價約6,000元，估計賣晒可以套現8億元。另外，會德豐地產嘅荃灣ONE MIDTOWN工貿項目地下其中一地廠獲以約3,000萬元洽購，呎價達約1.5萬元，將創新界區同類物業呎價新指標。

市場熱錢多，車位都賣個滿堂紅，發展商當然唔執輸，有代理同劉Sir講，佢哋一眾代理早前同恒地有關管理層傾過，話手頭有唔少客對上述鴻圖道52號工廈有濃厚興趣，正在積極游說發展商割愛，若果真係拍板拆售，其中一個方案就係全層賣。

恒地觀塘全幢值8億

個代理又話，恒地旗下鴻圖道工廈樓上高層市值呎價約6,000元起，中低層單位市值呎價約5,700元，至於地下等一批低層罕有地廠，市值呎價過1萬元。呢幢大廈樓高大約14層，總樓面逾13萬方呎，賣晒相信可以套現大約8億元。

另外，有代理報料，新世界發展（00017）亦都諗住放售上環中遠大廈地下至3樓商場樓面，意向價超過7億元，呎價超過2.5萬元，商場總樓面接近2.8萬方呎，現時租客包括健身中心等。

投資者2.1億購地廠

近排工廈物業銷情熱爆，有個投資者豪擲逾2.1億元購入觀塘駱駝漆大廈第2及3期地下一批地廠，呎價大約1萬元。

另外，睇番土地註冊處資料，投資者今年中斥逾2.4億元購入嘅同區怡生工業中心地下G及H地廠，其中E部分錄臨時買賣登記，涉資約6,926萬元，呎價估計超過2.3萬元，係近年新指標。

至於上述獲洽購嘅ONE MIDTOWN地下一個地廠，呎價講緊約1.5萬元，若落實亦將會係新界同類物業新指標。

唔少散業主都伺機放盤，美聯商業鄺寶謙話，觀塘皇廷廣場8A室，開價約2,540萬元放盤，呎價大約8,000多元。香港置業陳展岷說，屯門中央廣場17樓全層連兩車位，開價6,874萬元，呎價約3,500元。

另一方面，有消息指出，投資者尹柏權等初步計劃將會拆售尖東百樂酒店商場低層嘅一批舖位，預料入場費大約500萬元。