Fundman睇市:領匯升得有理

感恩節美國零售商旺丁又旺財,上周五美股半日勁升172點,重返萬三點關口樓上,收13,009點。港股隨外圍做好,上周累升755點,惟年晚收爐氣氛濃,日均成交得488億元。

香港回歸十五年,經濟轉型未見成果,但港人靠炒炒賣賣維生的伎倆,卻愈來愈爐火純青,特區政府嗰頭出BSD配合原有的SSD辣招,禁絕炒家沾手住宅市場,轉過頭一眾工廈、寫字樓炒到癲晒,連車位都炒到500萬元一個,上埋CNN國際新聞版,真係唔寫個服字畀班炒家都唔得。

諗落,上星期領匯(00823)除完息,仲可以升到43.1元癲價,唔係完全無道理,當然,唔係講緊長毛在立會法動議,回購最少兩成五股權。而係領匯手上嘅182個商場及停車場項目,單計8萬個停車位,即使以天價車位十分一價錢,講緊都已經係400億元,足足是領匯954億元市值的四成二,意味剩下的1,100萬平方米的零售商場(剔除街市及車位),平均呎價只係468元。

雖然領匯係房地產信託基金,唔可能出售資產套現,而且好多項目都係面積同回報較低的商場,但當股市人人望住磚頭癲價開始胡思亂想,已經無人再理領匯股息回報跌到得3.2厘。早幾日史提芬先話領匯有買貴無買錯,主要就係見到刻下股市,視領匯為地產股咁炒,睇資產價值被低估,這種想法啱定唔啱,只有等歷史話畀我哋聽。

但客觀睇,今日通街好息之徒,今年七、八月份,美國房地產信託基金派息唔少跌到3厘樓下,相信領匯遲早會到達差不多的水平,以街外預測一三年每基金單位派息1.43元計,即係47.66元,按近期升勢,或者股東未到聖誕就已經提早收到禮物。

百麗有望走出谷底

百麗國際(01880)困在12至16元之間橫行超過一年時間,上星期有報道指鞋王有機會失去一兩個品牌內地代理權,股價反而出現突破,收報15.7元,是近半年新高。經歷上半年同店銷售增長呆滯期,唔少分析員對零售股同店銷售步出谷底的預期愈來愈強(受預付卡生意大減的百貨股例外)。

大摩早前指,由於一一年百麗第四季同店銷售基數極低,估計下半年重返8%以上唔係全無可能。以1,277億元市值計,預期市盈率18.7倍,以未來兩年接近兩成的年增長,尚算合理,而且身為龍頭股,基金往往願意付出溢價,尤其對內需股睇法剛轉向,或者短期有機會上試18至19元水平。

史提芬