股海實戰：恒盛地產值博率高

港股上周唔覺唔覺又升咗上去，恒指上周五收報21,913點，一周升754點，有勢打破上落市格局，一旦抽穿月初高位22,149點，或會引發基金追貨補倉。

上周五傳來溫州金改試驗區實施細則出台，更有內地傳媒估計溫州民間資本容量已超過8,000億人仔。雖然呢啲資金係投入境外作為產業資本，而唔係直接流入魚缸，但消息足以提振魚缸人氣，滬綜指上周五升11點，收報2,027點。同日港股多隻市值逾百億元嘅股份股價創五十二周高位，當中不少為內房股，如中國海外（00688）、合生創展（00754）、世房（00813）等等，且成交都唔細。

全年銷售達標可期

落後內房股恒盛地產（00845），上周五以全日高位1.24元收市，升7.8%，成交3,495萬元。恒盛唔係一線內房股，加埋跟熔盛（01101）屬同系公司，呢兩年隻熔盛股價由高位滑落八成幾，唔多唔少亦影響咗恒盛嘅氣氛。再睇番恒盛嘅數據，今年十月實現房地產銷售額8.9億人仔，同比減少18%，首十個月累計銷售額則為97.9億人仔，已實現全年銷售目標嘅75%。十一月內房市場氣氛未有轉壞，相信呢兩個月公司有機會爭取到實現全年或接近全年銷售目標。

以現價計，恒盛一二及一三年預測市盈率分別僅5倍及4.6倍，估值算係便宜，炒落後條件存在。若然年尾內房股真係要瘋炒一轉，呢類估值偏低嘅二線內房股遲早吸引炒家目光。圖表上，今年第二、三季股價喺1元邊成功築底，上周五一支大陽燭上番250日線（現處1.21元），成交配合，若然今次能夠連續五個交易日企穩250日線樓上，可確認向上突破，五十二周高位在1.86元，具不俗值博率。