樓市出更：港島舖「開餐」噬貴租金

特色餐飲店雲集嘅港島天后區，電氣道一段早已聞名，由於目前舖位平均呎租已過百元，加上租盤唔多，故曾是車房等雲集嘅清風街，吸引唔少中檔餐廳及甜品店搶位，依家新舊食店數目佔該街舖位數目近六成，扯高條街嘅租金，現平均呎租約50元，較兩三年前累升差唔多五成。

劉Sir知道，天后港鐵站外嘅電氣道一段，地舖租戶除咗係地產代理同埋美容護理店外，大部分租戶都係各式飲食，佔整體約五成。由於現時吉舖放租唔多，唔少中檔餐飲店都向附近街道埋手。其中，清風街由於馬路兩旁可以泊車，對食肆來講係十分重要，可以畀客人駕車前來惠顧，因而近年成條街地舖新租戶不乏中檔餐飲、甜品店及日式食府等承租能力較強的商戶進駐。

商戶憂租金再上揚

現時清風街地舖數目約莫有35間，有區內代理老友話，兩、三年前地舖平均呎租只約26元，不過，隨住唔少中檔餐飲店進駐，現時條街但凡與飲食有關嘅店舖數目，已明顯增加至約20多間，扯高該街道平均呎租至約50元，升幅近五成。目前租用清風街雙號地舖作辦公室桌椅買賣嘅施先生表示，「近呢幾年生意都係一般，問價人多，買嘢嘅唔多，現時大部分生意都係靠熟客介紹，近年該街道唔少商戶都係做餐飲，擔心會刺激全條街租金上升。」

李冠亮擬買舖自用

至於近幾年頻頻入市工商及店舖物業嘅資深投資者李冠亮（Nelson），都睇好天后中檔餐飲前景，舊年承租咗清風街18號地下舖位，開設經營餐飲及鮮蠔等西式食肆。Nelson話，四、五年前清風街地舖租戶唔少係車房、塑膠製品及夜冷舖等為主，不過，隨住電氣道等街舖租金逐年上升，以及租盤少，部分商戶都轉到鄰近街道物色舖位。

Nelson仲話原本諗住喺清風街買舖自用，由於放盤唔多，暫時租用上址，舖位前租客經營夜冷生意多年，現以每月近4.2萬元租用，呎租約28元。