借平錢投資咪算得太盡

筆者朋友幾年前曾辭工全職讀書,為令手頭資金鬆動啲,於是向銀行借咗15萬蚊私貸,分兩年攤還,當時股市氣氛唔錯,於是用筆錢借孖展抽咗幾次新股,初時都有些少斬獲,但由於貸款到手第二個月開始月月還錢,加上無收入,炒股又有一定風險,跟住愈來愈忍手,朋友話最終新股「油水」剛好夠畀銀行利息。

第二輪稅貸出籠,借十幾萬都或者只係兩厘息,比私貸利息低好多,唔少藍籌股息率都有四厘以上,借低息貸款,投資高息產品,情況有啲似Carry Trade(套息交易),都係最怕「賺息蝕價」,當股價一跌,利率幾平都無用,一樣要輸錢。

辛文妮