股海實戰：中國燃氣好戲在後頭

港股尋日現「蠱惑的市」，恒指高開139點後轉反覆，午後升幅曾收窄至不足1點，誰不知其後大市又再發力，最終抽至全日高位見21,530點，收市報21,524點，升296點。呢個月繼續喺呢一千幾百點上上落落，係等整固完成下月起動做基金年結，抑或係大戶托住大市以配合大型IPO活動也好，反正呢啲市可視為炒二、三線股嘅安全期，贏唔贏到錢，就真係「同枱食飯，各自修行」﹗

潤燃配股有待消化

華潤燃氣（01193）尋日宣布配股並復牌，股價跌8%，收報16.96元。雖然有大行關注配股對每股盈利攤薄嘅影響，但阿莊就相信，潤燃配股集資係要為加快收購同業作好資金準備，故相信股價消化配股消息後，可重展升勢，並建議喺16元水平作中線收集。

講到燃氣股，阿莊早前話要睇位買番隻中國燃氣（00384），點知一路等都等唔到心儀買入價，尋日股價更喺盈喜消息下裂口高開，見4.72元，收報4.76元，升5.7%，成交1.6億元。

高盛最近就內地燃氣行業發報告，當中便將中燃嘅評級由中性上調至買入，目標價上調至5.5元，主要係認為中燃嚟緊會逐步淡出液化石油氣進口及批發業務，盈利和回報將有明顯上升潛力，而公司嘅估值亦未完全反映天然氣及液化石油氣資產嘅價值；另外，受惠於與中石化締結戰略合作關係，將有助中燃擴闊喺液化石油氣零售市場嘅市佔率，並降低壓縮天然氣及液化天然氣的設置成本，提供更多氣源以促成新建項目。

除以上種種原因外，阿莊一直對中燃有期待，係相信舊高層回朝後，定必有大製作跟尾。早前宣布與中石化（00386）合作，令人對公司另一主要股東北控集團嘅角色產生疑問，相信爭鬥尚未完結，好戲在後頭。再睇尋日股價以大成交向上突破，可以確認新一輪升浪已隨之展開，如無意外股價好快突破5元關，今日若見回調，阿莊會考慮上車，支持位可參考10日線4.48元。