樓市出更：東九商廈追尖咀差6蚊

呢幾年觀塘同九龍灣大變天，唔少保險及財金機構都爭住搬入該區，「出手」仲好闊綽，有代理話，一間來自港島嘅企業，以每月逾4萬元租用九龍灣國際交易中心中層戶，呎租大約30元，同尖沙咀康宏廣場高層戶租金差唔多。佢話九龍灣同觀塘商廈目前平均呎租與尖沙咀嘅差距收窄到只係6元，按年減幅達約25%。

代理同劉Sir講，上述國際交易中心中層戶面積約1,400方呎，每月租金約4.2萬元，呎租約30元。尖沙咀康宏廣場一個高層約1,900方呎單位，月前以每月約6.3萬元租出，呎租約33元，兩商廈呎租亦只相差約3元，而兩區目前平均呎租僅相差6元。另一原租用紅磡商廈嘅貿易公司，剛承租觀塘寧晉中心高層戶，月租約3.3萬元，呎租約25元，同尖沙咀星光行一個中層戶呎租睇齊。

外資15億購銅鑼灣全幢

有資金重錘追捧全幢商用物業，劉Sir收到風，資本策略地產（00497）等嘅銅鑼灣開平道1至3號「Cubus」全幢銀座式商廈，啱啱以約15.5億元連約賣咗，呎價大約2.28萬元，聽講買家係東南亞資金背景公司，據悉原業主○六年以逾3億元購入上址地盤，之後斥資重建。該物業總樓面約6.8萬方呎，樓高28層，樓上主要租戶為餐飲商戶。

尹柏權拆售荃灣230舖

熱錢開始流到九龍商廈市場，中原林嵐講，尖沙咀力寶太陽廣場高層06至07室連約近6,850萬元賣出，呎價1.45萬元，創該廈新高，原業主持貨四年左右帳面袋近2,315萬元，賺幅逾50%。美聯商業高逸威話，放盤僅兩日嘅旺角華邦商業中心1611室「蚊型單位」，面積300方呎唔夠，極速以約258萬元賣出，呎價8,657元，成為該廈新高。至於早前銷情火熱嘅觀塘宏基資本大廈，土地註冊處資料見到，該廈11及15樓各連同一批車位售出，涉資分別9,155萬及9,791萬元。

市場稱，投資者尹柏權將拆售荃灣大河道地皇廣場1、2及3樓共約230個商舖，同埋提供市場達首兩年5厘租金回報，入場費232.9萬元。