魚缸Blogger：首長科技炒味十足
尋日首長一系異常搶鏡，首長科技（00521）、首長四方（00730）、首長寶佳（00103）、首長國際（00697）同首鋼資源（00639）都逆市高收，其中首長科技喺成交急增下，即市再創0.52元五十二周新高，以近全日高位0.51元收市，炒味十足。
主要從事系統整合方案等業務的首長科技，今年初公布退出數碼電視業務，未來重心將投放在餘下的LED照明同環保節能等領域。雖然公司上半年虧損擴大至1.44億元，不過主要股東誠哥同淡馬錫一直未有放棄佢，加上出售業務的資金會用於投資及發展新業務，尋日逆市呈強，唔排除係因為早前跌過龍，亦話唔定公司將會有新搞作。短線股價如果守得住10日線0.43元，可博佢踢上6毫子。
首長科技（00521）
阻力位：0.60元
支持位：0.43元