Fundman睇市：憧憬放寬調控 內房繼續旺

前晚華府就財政懸崖的協商有進展，華爾街三大指數升幅介乎1.7至2.2%，蘋果公司連抽兩日，再升7.2%，直到收市後，穆迪把法國主權債務評級由Aaa降至Aa1，無論係巧合抑或陰謀論都好，對希望外圍止瀉撐起港股的好友來說，形同一盆冷水，港股昨先升後倒跌，10日線阻力21,387點得而復失。

近期，唔少本地財金精英齊齊高調唱淡樓市，辭官轉往私募基金搵食的梁錦松，雖然認同全球印錢下，實物資產較有效抗通脹，但卻指本地樓市太貴，唔建議投資者入市，認為歐美不乏投資機會。

另一邊廂，金管局總裁陳德霖，提醒市民樓市周期唔會只升不跌，更以目前每100萬元借貸為例，目前低息期二十五年按揭每月只供4,400元，但假如套用九七年利率，供款額會大增至1.04萬元，上調空間非常大，買家要留意風險。

阿松話歐美物業市場機會多，這確是事實，但隔山買牛向來難度高，且海外物業交易及持貨成本往往遠高過香港，好難吸引精明的本地炒家全身投入。至於陳總升息論，單睇美國QE1、QE2後，畀華爾街挾上轎，整個QE無限出嚟，量寬介入容易退出難，大家過去四年時間已經睇得一清二楚，全世界熱錢無地方去，即使美、德、日、英、瑞士、加拿大十年債息唔夠2厘，依然前仆後繼，如果驚升息，或者債商比業主更要擔心。

華潤置地成搶手貨

今年內房股確實是弱市奇葩，尋日咁反覆下，仲有五隻內房股創五十二周新高，包括龍頭股之一的華潤置地（01109），瑞信出報告唱好話潤地多得母公司華潤集團背景，在多個城市奪得興建商場地段，選址及投資潛在回報都比競爭對手好，目標價睇23.8元。

早前幾間大行都舉辦中國研討會，賓架籠統的結論，唔少認為歐美經濟暫時無大起色之下，刺激出口推動經濟的可行性，及不上重走舊路，再擴大基建、鐵路，以及適量的放寬樓市調控措施，市場估計內房股在未來陸續發表的一三年銷售目標，應不至於太過保守。

近年潤地調整住宅發展策略，集中用家主導的中小型住宅，首十個月合同銷售418億元人民幣，目標完成度83.6%，目前唔少二三線內房交投水盡鵝飛，基金就算覺得內房有條件炒復甦，也未敢賭得太偏，潤地同中國海外（00688）成必然之選。