股海實戰：上實城開逆市起動

美股前晚高收，帶動港股尋日高開215點，見全日高位21,478點，午後回軟，尾市更倒跌，恒指最後收報21,228點，跌33點，繼續行上落市。

十八大後，市場仍在觀望新一屆政府人事布局，A股氣氛淡靜。開始愈來愈多關於一三年經濟展望嘅分析，著名經濟學者夏斌就估計，改革措施效應滯後，加上歐、美經濟不會出現重大好轉，今年嘅問題會拖延到明年上半年，預計明年內地經濟增長大致穩定，但也別期望過高。有表叔朋友亦同阿莊講，今年政府換屆有不同之處，係上大人表明反腐反貪決心，如今官場人人自危，過去唔少用阿爺錢揮霍消費嘅情況，如今已見收斂，這必然會對中、港、澳三地零售以至娛樂消費造成影響，投資者不可不察。

保障房促進市場調節

內地房地產行業數據顯示，喺十一月十二日至十一月十八日的一周內，重點監測的四十個城市中，三十六個城市成交均同比錄得增長，主要係保障房集中入市簽約，純商品住宅交投量則有所回落。尋日見到恒大（03333）股價偏軟，收報3.54元，跌2%；中國海外（00688）、保利置業（00119）及潤地（01109）股價均微跌收場。

事實上，保障房陸續落成入市，將進一步滿足基層住屋需要，商品房價格同交投將自行作出調整，但官方再落藥調控樓市嘅機會甚微，故個人對內房股持中性睇法。至於明年內房股能否擺脫政策緊箍咒，重展活力，就要睇經濟復甦進度，以及市場流動性是否配合。

全年業績有改善空間

講到內房，聽講嚟緊會有三家內房企業啟動在港IPO活動，趕搭尾班車，個別中小型內房股一於少理行業數據，熱身炒影子概念，其中上實城開（00563）股價曾高見1.53元，收報1.5元，升4.89%，重上250日線，成交增加至3,360萬元。上實城開為上實系嘅主要地產平台，喺內地13個重點城市擁有25個房地產項目，規劃總建築面積超過1,700萬平方米，今年上半年營業額倒退46%至10.92億元，並錄得虧損3億元，預計截至六月底止之預售所得款項餘額為98.62億元，將於下半年起陸續轉為收入，故料全年業績有改善空間。

上實城開現價市帳率僅0.5倍，九月份股價最低曾見1.12元，之後反覆回揚，尋日逆流而上，係咪有動作跟尾，不得而知，但喺市場氣氛改善下，隻股炒上等適當時候抽水嘅可能性亦存在，可繼續留意交投，短線回吐守250日線1.45元，可繼續沿上升軌向上，下一阻力喺1.7元。