樓市出更：內地客避辣貴租照殺

政府出招加重內地客在港買樓成本，但有內地客需要住無計，於是由買轉租繼續捧港樓，上水唐樓單位獲內地客以月租約8,500元承租；天水圍嘉湖山莊都有內地客由搵買轉搵租，齊避BSD嘅風頭。

金龍地產馮宇成同劉Sir講，呢位內地來港的新移民原本一心入市買樓，但政府出招後無晒計，又未有「三粒星」，只好租住樓先，而上水區佢就比較熟悉，最終以每月約8,500元，租咗新發街雙號唐樓單位，實用面積得383方呎，勝在有裝修，呎租22.2元，個租價貴過不少新界大屋苑。

收租客趁減價買叠茵

嘉湖山莊都有內地客轉租，中原郭佩玲話，有個有仔女喺香港讀書嘅深圳客，九月已搵樓買，出招後即轉搵兩房租。有代理話，奧運站屋苑都有類似個案。

有內地客撐場，收租客未有手軟，中原張永泉話，灣仔單幢樓新春園大廈低層一房單位，收租客用373.8萬元入貨，呎價10,471元，估計月租達1.4萬元，單位○四年到依家升值五倍。美聯黎泳傑都話，筲箕灣海灣華庭高層單位，連租約減價15萬賣343萬元。

另外，新界辣招盤都有投資者吼，賺親都近百萬，祥益黃振文指，屯門叠茵庭3座中層B室，十二日內減咗20萬被收租客310萬元買咗，扣埋SSD約一年半帳面賺96.5萬元。利嘉閣姚頌唐話，深井麗都花園3座低層A室，賣咗396萬元，揸貨一年單位升值32%。

鯉景灣扣稅仍賺百萬

聽美聯曾偉民講，西灣河鯉景灣逸榮閣低層E室，上車客用639萬元入市，呎價1.02萬元，扣約32萬元SSD，帳面更加賺夠109萬元。

市場「筍盤」被搶購，美聯黃少明話，將軍澳新都城3期都會豪庭2座低層F室，業主叫價吸引，即有兩組客爭貨，最後賣580萬元。世紀21北山彭志偉指北角和富中心1座低層過千呎單位，售1,350萬元，低市價10%，呎價1萬有找。