Fundman睇市：酒股現災情

十八大前，筆者到過中南海餐廳，見到收銀櫃台放住唔少茅台，叫價每支18,888元人民幣，幾乎是街外所見十倍，雖然早有心理準備價值不菲，仍然教筆者愕然，隨行老友見大鄉里出城，拉住筆者笑言在北京開茅台，唔少係公費開銷，並無大不了。

十八大塵埃落定，總書記習近平第一次演說，承諾要人民過美好生活（唔知包唔包括合理價買到茅台！），誓言解決貪污腐敗，儘管兩會制訂「三公消費」限制，不過威力顯然無今演說咁震撼。而被市場視為反貪腐指標之一嘅白酒價格就持續下跌，以53度飛天茅台為例，就剛跌穿1,400元人仔，同去年同期比較得番六成左右，囤積貨源的酒商聞到燶味急散貨，加上官員消費預期減少，劉伶預測春節後隨時見1,200元人仔，酒災味道濃厚。

內地幾隻白酒股，近日跌幅唔細，貴州茅台、五糧液、瀘州老窖尋日最多跌介乎7至9.3%。彤叔揸重貨、專門幫五糧液做經銷的銀基（00886），尋日朝早炒高，最後收2.77元，升0.17元，以為跌咁耐有死貓彈會有好嘢跟尾，點知收市彤叔申報，上周三減持咗596萬股，持股量落到7.58%。內地白酒市場短期似乎無起色，加上銀基唔少機構股東坐重貨，最怕人人爭出貨，搞到人踩人。

三隻排隊上市新股，筆者最頻光顧也最感興趣肯定係「一生一世」翠華（01314），留意到唔少專欄認為定價太進取，PE比大快活（00052）、大家樂（00341）高一截，尋日八卦打畀buy side老友一問，意外地，保薦行今次相當招積，講到明配售部分未必夠分，到底係吊高嚟賣抑或趁散戶嫌貴基金圍晒飛？抱住小注怡情心態，都係要抽少少，博掛牌日有胡可食。

長城汽車再度發力

汽車股當炒，早前提過東風（00489）因中日關係緊張，銷售數字令市場跌晒眼鏡。而本地車企在事件中直接受惠，例如長汽（02333）第三季就多賺1倍至14.88億人民幣，早前公布的十月份市佔率，進一步增加4.3個百分點，去到45.1%，加埋下半年長汽兩款新車「哈弗H7」及「哈弗H2」推出，相信今年下半年至明年上半年，業績都會持續亮麗。

長汽十一月股價由21元起步，升到24.55元，整固超過兩星期，尋日又重返24元樓上收市，一二年市盈率12倍，汽車股中唔算最平，不過賣點夠力加埋基金換貨揀無日味的股份，今次破位應有機見26至27元。