樓市出更：車位嗌貴20%閃放

車位投資氣氛熱鬧，有投資者早前大手向發展商買入沙田碧濤花園5個車位，已極速喺市場放盤，比買入價叫高約20%，每個開價逾40萬元；另外，荃灣立坊有投資者斥約79萬元買入車位作投資收租，車位不足六年升值達3.2倍，升值能力比住宅更理想。

劉Sir同代理老友傾開，話近期車位市場氣氛熱爆，好似早前發展商一手開賣碧濤花園車位，已經有唔少二手車位喺市場放盤，其中有投資者早前以每個30至35萬元大手買入5個車位，最近以每個40至42萬元放摸貨，有機會成為該屋苑車位新高價。

朗逸車位搶高未到價

美聯物業表示，荃灣立坊有投資者以約79萬元，買入一個單號車位作長線收租，預計回報率約4.3厘，原業主○七年買入價18.6萬元，不足六年，帳面大幅升值達3.2倍。

另外，同區朗逸峯有4個車位，原定尋日透過環亞拍賣推出，當中一組相連車位，喺拍賣前已率先賣出，成交價均為25萬元；而拍賣場上另一組相連車位，開拍價合共48萬元，亦一度搶高至50萬元，惜未到價被收回。

至於同場推出嘅大埔盈峰翠邸兩個車位，分別開價25及27萬元，亦吸引區內用家到場爭購，但由於受到大廈公契條款限制，開拍前指出車位使用者必須為大廈住戶及業主，令到居於附近屋苑龍成堡、有意買入呢個屋苑車位自用嘅準買家，喺未有出價情況下失望而回。環亞拍賣曾傑俊同劉Sir講，個別新屋苑為提升私隱度，而限制車位物業嘅使用權。

富榮租金叫到3500元

另外，下個禮拜亦有兩項銀主盤推出拍賣，包括名家匯1座低層B室連車位，面積逾2,400方呎，相信係該屋苑首宗銀主拍賣。據土地註冊處資料，該單位喺年多前以逾2,300萬元購入，並曾承做4次按揭，據悉，單位近月淪為銀主盤。

過去一年車位租金急升，亦係吸引投資者嘅原因，置業18高俊文指出，旺角居屋富榮花園目前車位月租升到3,200至3,300元，現時車位租盤不足10個，個別叫租3,500元。