股海實戰：中電信毋須再睇淡

中、美兩國政治大事完結，魚缸開始走出政治市嘅陰影，只係局面仍舊乏善足陳。人保集團已展開上市前推介，如無意外會喺本月下旬展開IPO活動，下月上旬在港掛牌，據講集資額達到40億美元。若成功上市，相信會係今年最大嘅一隻新股，見其保薦人陣容鼎盛，包括中金、瑞信、高盛同滙豐，睇咁嘅形勢，加強阿莊嘅信念，即呢兩、三個星期港股只係抖抖氣，等十二月人保登場再發力，順道做埋份年結成績表。

新稅法鼓勵揸A股

雖然上周中國政府正式換屆，但A股未有異動，上周五滬綜指險守兩千點關，其實呢個只係心理關口，並非牢不可破。中央政府未有停止維穩行動，上周五財政部便下發通知，對個人從公開發行和轉讓市場取得嘅上市公司股票，股息紅利所按持股時間長短實行差別化個人所稅政策，持股超過一年嘅稅率為5%，持股一月至一年嘅稅率為10%，持股一個月以內則為20%。即係話，政策鼓勵散戶長揸收息股，而不鼓勵短炒行為。問題係，呢項政策聽落係利好長遠穩定發展，但對於短期刺激支持A股表現嘅作用則有限。

中電信（00728）今年股價猶如坐過山車，由去年底4.42元升上三月高位4.77元，再回落至六月低位3.23元，之後回升上九月高位4.92元，十月份未能突破4.9元阻力之下，又再展跌浪，上周低位見3.97元，上周五收市報4.15元，單日升4%。

照計股價落到4元邊，已頗大程度反映各項負面因素，包括今年盈利將現約一成嘅倒退，以及年底前將會推出iPhone5產品，以至手機補貼再進一步增加。不過，阿莊認為，推出新智能手機產品，有助帶動數據用量，故亦非一面倒睇淡，而展望明年，公司收購母公司CDMA網絡嘅效益將展現，盈利有望回復增長。

再睇短線技術走勢，上周14日RSI曾低見22，觸發反彈，現時10日及250日線分別處於4.25至4.22元，呢轉若能以大成交重返其上，可望再上試50日線4.5元阻力。