樓市出更：九龍灣商貿地等破頂

今個禮拜五政府有兩幅地皮截標，包括九龍灣常悅道商貿地皮，劉Sir知道區內商廈呎價最近屢創新高，唔少測量師老友都睇好呢幅地，市場最高估值約24.98億元，每方呎樓面地價約7,500元，勢問鼎政府成交呎價最高單一商貿地皮；連同將軍澳第68A2區限量地，兩地皮可為庫房帶嚟最多51.88億元收益。

劉Sir話畀大家知，喺上述九龍灣常悅道商貿地推出前，九龍灣已有年幾時間無同類土地供應，對上一幅已經係高銀金融（00530）舊年七月以34.32億元奪得嘅同區啟祥道與宏光街交界商業地，當時每方呎樓面地價約莫4,062元。

同區供應少 租售搶手

然而政府起動九龍東，再加上啟德郵輪碼頭效應，九龍灣商業市場過去一年升勢強勁，個別寫字樓成交呎價仲突破咗1.1萬元水平，連劉Sir都睇好呢幅九龍灣常悅道商貿地皮前景。

高緯環球張翹楚話，目前九龍灣寫字樓空置率維持3%以下低水平，市場有需求，投得嘅財團日後將項目無論放賣或放租，相信都無乜難度。佢估計呢幅商貿地成交價約24.98億元，每方呎樓面地價約7,500元，係市場上限價。一旦售出，足以成為政府歷來最貴重商貿地。

將軍澳地限逾535伙

劉Sir知道，會德豐地產舊年八月以40.28億元投得嘅紅磡灣紅鸞道商業地，樓面呎價約6,827元，係目前政府單一商貿地皮呎價最高。

另一邊廂，將軍澳南亦再有限量地應市，上述第68A2區臨海限量地，總樓面大約57.3萬方呎，土地劃為A、B兩區，兩區嘅住宅樓面分別約26.5萬及19.4萬方呎，加埋就大約45.9萬方呎，發展商要起唔少過535個單位。

由於區內已有多幅限量地相繼批出，測量師老友都估計呢幅地價唔差太遠，每方呎樓面地價料約4,500至4,700元，估值約25.8億至26.9億元。