Fundman睇市：A股疲態未改淡友贏形勢

好嘅唔靈醜嘅靈，尋日話港股反彈成交不升反跌，唔係好兆頭，結果真係一彈就散，昨日仲一跌到底，貼實全日低位收市。愈來愈多人講美國快將跌入「財政懸崖」，但連任的奧巴馬卻闊佬懶理，皇帝唔急剩番一班股壇太監獨自急，悲觀情緒愈滾愈大，畀機會淡友做嘢。

恒指尋日跌333點，報21,108點，成交529億，比周三多46億，沽空佔主板成交9.59%，是本月一日以來最多，意料之外是十八大塵埃落定，近期內地又狂批新QFII額度給一眾外資行，可是對A股刺激作用不大，滬綜指隊到個半月低位見2,030點。

經昨日一跌，恒指10日線搭住20日線，作勢出現所謂「死亡交叉」。技術上，下面較有力的支持，是九月升浪的0.382調整支持位20,975點，這正好同50日線的20,978點十分接近。

尋日港股焦點肯定係邢李㷧突然趁供股權證拉閘前，大手翻兜思捷（00330），股價勁升22%，收12.96元。由打工仔進身時裝公司老闆，趁思捷業務環球化最輝煌一刻，分段減持套現210億元之後全身而退，締造股壇佳話。但到底邢李㷧是不忍一手建立的江山兵敗如山倒，希望攜手再創高峰？抑或純粹喺套現所得攞個「零頭」出嚟支持支持？

歐美消費市場大不如前，Zara等對手今時唔同往日，咁艱難環境救唔救得番Esprit，筆者個人就唔太睇好。尋日咁挾法，應該同近期唔少基金表明放棄供股，唔少淡友在11元樓上積極沽空，因而要急急補倉有關。最高興莫過於滙豐及瑞銀兩家出到「硬包銷」的投行，筆包銷費可以袋袋平安。

大唐有勢追落後

跌市中，華能（00902）股價卻逆市而行，創三年半新高。中國公布十月份社會用電按年增長6.1%，是七個月以來最高。由工業用電明顯反彈所見，內地經濟活動復甦，正帶動電力需求回升，配合動力煤價由去年大幅回落，電力股業績也從第一、二季由燃煤成本回落帶動，去到第三、四季由售電恢復較快增長所牽引。

華能創新高，反觀大唐（00991）有點令人失望，今年累積升得7%，同華能的53%相比，輸緊七條街。近一季的大行評論，主要針對大唐的單位燃料價格回落幅度不及華能。睇番兩股估值，華能一二年PE回升至11.8倍，反觀大唐仲停留在9.3倍，折讓兩成二，問題應充分反映，昨日成交初見增加，有追落後之勢，唔貪心，睇一成至一成五升幅。