股海實戰：莎莎候調整上車

十八大曲終人散，新一屆政府最高決策層亦已底定，基本上喺意料之內，正所謂「一朝天子一朝臣」，阿莊相信要等明年三月兩會，先至摸得透嚟緊財金政策有咩改變，呢段時間A股可能繼續上上落落，升唔起但亦跌唔落。

內地金融股亦受雲霧所蓋，恒生H股金融行業指數跌2.2%，跑輸大市，其中僅中信証券（06030）一隻成分股能逆市高收，唔排除明年三月兩會前，中資金融類股都維持反覆偏軟格局。所以阿莊尋日索性沽出中國人壽（02628）。

講番恒指，尋日唔見三百幾點，單係隻騰訊（00700）跌幅已相等於67點。今次騰訊業績略遜預期，股價跳水，暫時衝300元關無望，但見大行評價唔係咁負面，且看250元承接力如何。

安東油服逆市發威

上周五阿莊話，隻頁岩氣概念股安東油服（03337）股價守住2.4元水平可睇位落注，尋日見佢落到2.45元跌唔落，遂以平均價2.48元追入10萬股，誰知真係開車，高位曾見2.67元，收報2.66元，升6.8%。可惜手持嘅波斯登（03998）呢期被大行唱淡，尋日股價質到落2.23元，收報2.27元，跌近7%，呢轉調整守得住250日線2.2元會繼續坐貨，睇埋月尾公布嗰份成績表再算。

莎莎（00178）派發中期業績，純利增25%至2.8億元，毛利率上升1.8個百分點至45.7%，每股盈利10仙，派中期息連特別股息每股7仙。睇見期內本地商舖租金及勞工成本上升，公司仍能錄得如此佳績，都算交到功課，尋日股價再創五十二周高6.02元，收報5.94元，升8%，成交8,303萬元。

睇嚟，莎莎嘅成功在於不斷擴大生意額，銷售額增長足以抵銷租金成本上升嘅影響。能夠喺本地經濟不景氣嘅時候保持佳績，都係多得源源不絕嘅個人遊表叔撐場，只要祖國支大水喉繼續射住，加埋公司不斷拓展內地市場，可以繼續做大個餅，最重要係公司經營現金流高，零槓桿比率，只要拓展內地市場步伐得宜，應可維持派息政策。只係考慮到近期股價已迭創新高，市況又唔多就，想買貨可以忍忍手，若呢轉喺6元關遇阻回落，可候回試50日線（現處5.23元）支持再作考慮。