樓市出更：瓏門貴單位港客佔多

以區內新高呎價開賣嘅新地（00016）屯門嘅瓏門，等咗一排個樓盤終於分咗契；睇番個盤呎價同成交價最高嘅10宗成交，以公司名義登記嘅買家只佔一半，個人名義登記佔另一半，當中只佔4個登記人名屬內地國語拼音，翻查下全都非本港或內地熟悉知名人士。

瓏門之前開售，好多優質單位成交呎價都「萬萬聲」，大家都好有疑問係咪內地人嚟掃樓，谷高樓價。不過，劉Sir睇番田土廳記錄，呎價最貴同成交價最高嘅10宗成交，亦都幾乎係呢個盤最貴嗰10伙，當中有一半以個人名義登記，名字屬國語拼音只佔4伙；而以公司名義登記嘅買家公司董事，亦絕大部分都係香港人。

咁睇嚟，今次撐起屯門樓價嘅有唔少係本地人，亦非純由內地人谷起，事實上個盤鄰近內地，本地及中港商人都有需要買樓方便中港兩邊走。嗰4個由中港商人承接嘅單位，呎價由1.2萬到1.7萬元不等，售價由約莫1,341幾萬元到3,140幾萬元不等。

不過，講到瓏門成交價同呎價最貴嗰個單位，暫時係第1座D室嘅複式戶，單成交做價3,390幾萬元，不過唔知連唔連車位，如果純用單位面積約莫1,800幾方呎計，呎價要成18,300元，打破晒屯門歷年分層戶呎價新高，而買家係用鋌銳有限公司名義持有，董事包括兩個姓廖嘅女士。

公司董事清一色港人

講番用公司名義登記，瓏門10大最貴嘅成交中，只有一半係用公司名義買，呢啲公司嘅董事幾乎清一色係本地人，睇番佢哋嘅註冊地址，大部分都係屯門區工廈，又或者荃灣或觀塘呢啲傳統做廠嘅地區，所以估計買家大部分都係實業家。