股海實戰：比亞迪翻身靠國策

港股反彈逾兩百點，中資股回升，係咪出最後努力為今日中央政府新一屆領導班子亮相造勢，不得而知，但見市況反彈成交縮減，都係睇定啲好。今年政治市嘅影響高峰已告一段落，嚟緊焦點係美國「財政懸崖」同歐債危機，但呢兩樣嘢都好似長期病患，間唔時又發作，就係醫唔好，卻又唔死得！

一二年真係好多奇怪現象，好似美國經濟差到冇朋友，但美元卻成為資金避難所，美股不跌反升；再睇內地經濟保住7.5%增長目標，但A股就不斷尋底。阿莊相信，呢啲不正常現象終歸會作出修正，目前一三年嘅展望能見度仍未係好高，且看今日中國新領導班子會唔會發放一啲正面訊息。

翠華名氣有優勢

大型連鎖茶餐廳翠華（01314）招股上市，保薦人係當年以炒股仔見著嘅德銀。按一二年度（三月底止）純利1.03億元，往績PE30倍，但德銀嘅研究報告預計，其一三年度純利為1.57億元，即係話預測市盈率介乎16至19倍，咁計同現成同類股比又唔算好貴，但亦唔算好平。平心而論，近月股市氣氛好番啲，IPO市場靜咗咁耐，翠華勝在名字為港人熟悉，確有優勢，但最終炒唔炒得起，就要睇保薦人嘅功力！

周五恒指成分股進行檢討，國指新貴大熱就有長城汽車（02333），取代嘅可能係比亞迪股份（01211）。講到比亞迪，昔日股神愛股萬千寵愛在一身，但投資以百億元計嘅電動車項目，竟然只係換來銷售千幾架電動車嘅局面，業績又有見紅之虞，難怪股價一沉百踩，由○九年高位88.4元回落至舊年九月低位10.92元，直到今年第三季喺12.5至13元水平成功築底，九月底開始股價重現升勢，突破去年末季高位及250日線亦未肯回頭，尋日收報20.1元，升3%。

阿莊心想，其股價累跌幅度經已可以話係衰到貼地，即使真係踢出國指，亦冇咩大不了。反而，重新着眼基本因素，美銀美林最近引述比亞迪指，預期一三年強勢推出一系列新款車嘅帶動之下，有信心走出為時三年嘅低谷，但該行給予比亞迪嘅目標價才12.3元，與現價有頗大距離。

潛在價值待發揮

阿莊相信，比亞迪嘅電動車成功與否，國家嘅政策支持至為重要，若然未來有更多公務車指定使用電動車，而比亞迪嘅產銷能力又能配合，要翻身唔係毫無希望。最近公司與國開行合作就公交大巴及出租車市場推零首期零成本零排放計劃，就係一個好例子。只有做出產銷規模，作為全國最大電動車生產商嘅比亞迪，潛在價值將得到發揮。再講今年業績可能見紅，形成明年嘅比較基數較低，亦有利管理層做番好啲份成績表，且看明年能否轉運成功！