樓市出更：為求租屋倒貼廚櫃

政府出招後，近排多咗市民「轉買為租」，但礙於市場租盤嚴重短缺，租客想搵到單位租都唔係咁容易，一定要諗計先得。劉Sir收到風，粉嶺花都廣場有租客為咗要業主租畀佢三年，居然提出「你租畀我，我送廚櫃畀你」嘅新招，最後成功以每月8,900元高價租咗屋苑頂層單位，呎租大概17.1元。

金龍地產王靜強同劉Sir講，上述花都廣場3座頂層連天台單位，面積約521方呎，以每月8,900元租出，呎租17.1元，屬市場高價。佢仲話，呢位新租客從事裝修行業，原先打算斥資入市屋苑兩房單位，但最近樓市唔明朗，影響佢置業嘅部署，最後決定轉買為租。

將中減完價仍新高

老友同劉Sir講，呢位租客希望有較安定嘅生活，眼見單位廚櫃殘舊，自己又係「行家」，所以向業主提出自資裝修廚櫃，作為三年長租期嘅代價，估計連同重置煤氣喉等裝修成本，涉資都要幾萬銀。

王氏補充，花都廣場本月暫錄得約6宗租務成交，平均呎租近16元，但市場租盤真係極為短缺，有樓睇嘅「鎖匙盤」僅得2個咁大把。

買賣方面，市場優質單位都有買家唔怕政府「辣招」，以好價接貨，中原柯勇話，將軍澳中心6座高層C室永久海景單位，面積899方呎，經議價後業主同意輕微調低8萬元，終由外區買家以742萬元承接，呎價8,254元，係同類單位新高價。

該行林振邦都話，優質單位業主減價意欲其實唔係咁大，用家都唔介意以好價承接，青衣青怡花園1座高層D室三房單位，面積約670方呎，外望公園景致，成交價約465萬元，創該屋苑新高價，呎價約6,940元。

港運城提價照承接

此外，有業主覺得市況無想像中咁差，大膽提價都成功沽貨，中原林龍南稱，北角港運城1座中層D室，原開價900萬元，放盤即獲查詢，但當業主知道原來屋苑放盤入場叫價已經接近1,000萬元之後，大膽提價15萬元，最後以915萬元沽出單位，呎價9,683元。