股海實戰：電力股有望弱變強

港股持續調整，恒指尋日唔見兩百幾點，眨眼已由月初高位回落966點。中資股沽壓大且跌勢全面，僅少數消費零售股能逆市上升，而早前不斷流入香港嘅熱錢亦似乎無以為繼。

啱啱過咗嘅周日係四條一光棍節，內地網購營運商積極促銷，聽講當日嘅網購金額達191億元人仔，打破全球網購單日交易金額紀錄，真係唔講得笑！

海爾電器隨時開車

國美喺網購方面嘅發展比對手慢，近年業績明顯受到開拓網購業務所拖累，但站喺市場策略上，呢場仗幾難打都要打。國美現價約0.81元，往績市帳率唔到0.7倍，聽聞確有對沖基金喺6、7毫子水平坐咗批貨，但九月以來港股升咗唔少，國美股價都係升唔起，顯見蟹貨區沽壓真係比想像中大。阿莊估計呢隻股最快要到明年下半年先至轉運，要炒不如直接買受惠補貼政策嘅家電股，其中海爾電器（01169）係實力之選，現價一二及一三年度預測市盈率分別係12倍同10倍，月初以來股價喺10元水平整固，未肯大回，提防隨時會再開快車！

尋日見到地產信託基金做好，其中領匯（00823）同置富（00778）單位價格均創上市以來新高，睇嚟投資者睇唔通後市方向，暫時停泊喺呢類基金避險。若然呢個趨勢持續，照計啲中資電力股都可以翻兜。事實上，九月以來恒指最多升逾兩千點，但以現價計，除咗隻華能（00902）有啲睇頭之外，其他如潤電（00836）、華電（01071）同大唐（00991），通通都係跑輸大市，充分顯示喺升市中，呢類低啤打（Beta）股不受重視。如今等到大市調整，強勢板塊轉弱，此前弱勢嘅電力股反而有望逆市做好。

早前阿莊亦炒過隻華能，沽出價都係同現價水平差唔多。再睇潤電同華電，近期低位基本上守住第三季以來嘅支持區，不妨留意資金流向，若板塊人氣增加，論實力首選乃近日獲大行唱好嘅潤電，16元邊上車，博衝18元關，跌穿15.3元止蝕；若嫌價位大則可選落後嘅華電，目標重上十月高位2.21元，跌穿1.92元止蝕。