樓市出更：銀主貨鬥閃減價唔手軟

遏抑住宅「新辣招」推出，市場交投持續急凍，個別銀主同業主普遍肯減價10%已獲承接，銀行方面亦「無咁進取」，好似九龍塘又一村銀主盤，尋日以1,860萬元低於銀行估價拍賣成交，而多次減價嘅元朗農地銀主盤，以「一口價」384.8萬元同場賣出。

尋日環亞拍賣行推出多個銀主盤拍賣，劉Sir當然有捧場，其中又一村壽菊路安華閣一個單位連天台C部分及地下單號車位，實用面積約1,212方呎，獲4組有興趣買家出價競投，最終以1,860萬元賣出，相信係用家承接。

銀行罕有到場觀察

據悉，上述安華閣銀主單位，原獲銀行估價約1,900萬至2,000萬元，最終以1,860萬元賣出，較開價1,600萬元搶高逾16%，但仍低於銀行估價，反映銀行方面對貴價豪宅嘅取態開始軟化，願意以「折讓價」沽貨。

至於多次減價翻叮再拍、佔業權份數二十四份之五嘅元朗農地，亦以384.8萬元「一口價」拍賣沽出，較首次拍賣開價減幅足足超過三成。劉Sir尋日亦罕有地見到銀行代表到場，相信係想藉住拍賣觀察市場氣氛有否轉變。

另外，忠誠拍賣尋日亦推拍多項物業，其中3項物業喺拍賣前售出，包括開價238萬元嘅皇后大道西僑成大樓中層F室、開價648萬元嘅粉嶺華慧園1座連天台及車位，同埋開價110萬元嘅灣仔298電腦特區樓上相連舖。

肯減價10%有承接

聽忠誠拍賣負責人鄭世傑講，自政府出招後，拍賣場出價競投情況減慢，但部分心急業主肯減價，通常可以喺拍賣前賣出單位，認為業主願將叫價調減10%，市場已有承接。

而環亞拍賣負責人曾傑俊話，佢哋拍賣前亦賣出兩項物業，包括西貢壁屋一伙連天台住宅，成交價約157萬元，呎價只約2,875元，低於市價；另青山道金盟大廈樓上舖以35萬元沽，實用面積約78方呎。