Fundman睇市：短線跟炒無妨油砂股有景

中國十月新增貸款5,052億人民幣，是一○年十二月以來最少月份，加上市場預期「財政懸崖」問題未必趕到年底前解決，基金風險胃納大減，大市成交比上周減少兩成一至455億元，是四星期以來最低，恒指升45點，報21,430點，相比上周四、五跌市的6.3%跌幅，彈力疲弱。

雞犬皆升的局面，變成消息主導，上周表示獲批到加拿大多倫多作第二上市的陽光油砂（02012），升11.6%，報3.74元，過去八個交易日升幅43%。睇番呢隻今年三月上市，在加拿大阿薩巴斯卡（Athabasca）地區開採及提煉油砂的公司，招股價4.86元，查實仲潛緊水。

十年八載前開採油砂嘅人唔多，主要是油價唔夠高，抵銷唔到高技術開採成本，不過，金融海嘯前油價飆升至近150美元一桶水平之後，油砂公司立即如雨後春筍般開個不停。地質學家估算阿薩巴斯卡120萬英畝油砂礦，擁有700億桶原油儲量，陽光油砂手上三個油砂礦擁有178億桶儲量，到一六年第三個礦商業投產，日產量達到20萬桶，以油價90美元，每桶毛利30美元計，相當每年毛利21.6億美元（167.4億港元）相對目前105億港元的市值，計落的確好誇。問題係到底地下儲量是否有估算咁多？技術上油砂礦係咪真係能夠由目前每日一千幾百桶，去到每日廿萬桶的目標？油價幾年後仲有冇90美元咁好景？凡此種種，都令這類股份充滿變數及不明朗，跟風炒吓無妨，長線就要小心衡量風險。

鐵路基建股炒復甦

十八大前後，基金界有多個中國投資研討會，筆者有幸同幾個基金經理閒聊，大都認為通脹已回到2%安全線樓下，加上後十八大政局塵埃落定，有利一些振興經濟政策出台。有趣的是，中央講到明唔會重行「四萬億」的舊路，但大部分意見卻認為，在建材、鋼鐵等產業嚴重供應過剩下，加快鐵路基建是相對風險細收效大，尤其相比谷極都谷唔起的內需，以及中央忌諱的放寬房地產限制，較為可行，同時協助消化上游產業的供求失衡。

留意中國中鐵（00390）及中交建（01800）兩隻鐵路基建股，由前者的第三季業績以及發改委加快審批鐵路項目可見，最壞時刻應已過去。兩者的一三年預期市盈率分別為9.8倍及7倍，唔單止比○九年更低，較歷史估值中位數15.3倍及13.3倍，更分別折讓36%及47%，一旦確認行業進入復甦期，相信估值有機會回歸到接近中位數水平。