股海實戰：騰訊挑戰300元大關

港股尋日窄幅上落，市場缺乏焦點，大家都喺度觀望美國解決「財政懸崖」進展，以及周內十八大完結新一屆政府領導會有咩好消息公布，但阿莊擔心好消息只係重新已公布各行各業嘅利好政策，即係話冇新嘢。事實上，近呢個月港股升，但A股似乎唔多跟得上，一向耳靈眼明嘅表叔們，若然預知有重大利好消息，冇道理唔郁手，所以呢兩日最好都係靜觀其變，大動作可免則免。

內地傳媒報道，北京及上海推新能源車扶持政策有眉目，見比亞迪（01211）股價係威係勢，抽穿20元關，奇怪係三點過後有震倉活動，股價插到落19.6元水平，之後又再快速重上20元樓上，收報20.6元，升5.5%。若然大戶震倉，可能真係醞釀緊咩好消息，短線10日線（現處17.4元）抽穿250日線（17.8元）嘅話，有機會再開轉快車，下一個較大嘅阻力位喺四月高位23元水平。

中國油氣炒上有理

股仔方面，上周五股價異動嘅中國油氣（00702）尋日回吐，收報0.187元，跌7%，成交1,621萬元。公司喺收市後公布，與中國石油集團合作開發嘅山西三交煤層氣項目，即將開始管道煤層氣銷售，咁講法隻股冇道理唔炒上去，跟炒定止蝕位喺10日線0.175元，博佢呢轉踢穿250日線0.212元。

再睇番大價股，騰訊（00700）將於本周三公布季度業績，近日唔少大行陸續發表預測，其中高盛預計騰訊第三季度每股盈利按年升39%、摩通就上調騰訊一二至一四年度每股盈利預測，目標價睇306元。騰訊尋日收報271.4元，升1.65%，成交7.45億元。

騰訊今年八月中公布上半年每股盈利按年升15.8%；單計第二季嘅收入及純利則分別按季增9%及5.1%。一公布完中績，翌日其股價升勢甚急，好快就由230元升到上250日蚊，之後雖有回吐，但未見回落至公布中績前嘅水平。

若然今次第三季度業績理想，唔排除股價會係中績翻版。班炒家唔執輸，尋日開始熱炒騰訊相關輪證。阿莊就始終認為，騰訊屬新興媒體股，基於網絡需求處高增長，有助抵銷傳統經濟周期性調整所帶來嘅衝擊，加上公司不斷優化服務，龍頭地位穩固，相信可繼續穩坐一哥地位，只要業績對辦，明年首季前股價可反覆向上挑戰300元大關，支持位可參考50日線259元。