樓市出更：租金易傾擴舖潮又起

外圍經濟不穩，加上內地消費力放緩，令本港奢侈品市場受壓。喺核心區一線街有唔少分店嘅太子珠寶鐘錶，今年上半年嘅高檔鐘錶營業額就跌20%，佢哋話現時街舖業主叫價亦都無咁進取，所以續租都會好傾咗；由於中高檔消費力持續，佢哋計劃拓展中價年輕鐘錶品牌，今明兩年該品牌開店達8至10間。

太子珠寶鐘錶執行董事朱繼陶同劉Sir講，過去兩三年奢侈品市場零售增長強勁，去年聖誕期間，佢哋高檔鐘錶嘅營業增長達40至50%，但今年會係「大漲小回」，畢竟歐美經濟前景不穩，內地又有調控措施，佢哋上半年高檔鐘錶嘅營業額就跌咗20%，不過，中價鐘錶銷量仍然好唔錯，十．一黃金周生意表現都幾好，估計第四季營業額會升15至20%，若果全年計有單位數字升幅已經好好。

太子珠寶加碼攻副線

朱氏認為，中高檔消費品仍然強勢，自去年收購咗JustGold後，開咗主打年輕人鐘錶嘅副線JustWatch，現時包括新地（00016）銅鑼灣wtc more在內，已經有3至4間分店，目標今明兩年，開店達8至10間，暫時以商場店舖為主，產品單價由5,000元起，同賣開幾十萬元一隻手錶嘅太子珠寶鐘錶，明顯將客戶群擴闊至不同階層。

佢話內地客佔太子珠寶鐘錶營業額達90%，而佔JustWatch亦預計都有70至80%。隨着奢侈品消費力顯著減慢，集中一線街、多以萬呎巨舖經營嘅太子珠寶鐘錶，佢話，雖然業主唔會點減租，因為旗下商舖多位處靚位，但業主叫價上已經無咁進取，依家續租都會易傾咗。

wtc more生意料11億新高

另外，新地代理租務部總經理鍾秀蓮亦分享商場營業額數字，佢話wtc more首三季生意額8.21億元，預期全年可達11.38億元，按年升23%並創歷年新高，年內引入約20個新商戶，租金升幅約20%，而投資逾2,720萬元的優化商場設施，將於今年底至明年第二季陸續完成。

為迎接聖誕，該商場耗資540萬元宣傳推廣，期內組織24個內地購物團，料可額外帶來528萬元生意額。