Fundman睇市：內房有睇頭

近期中國及美國經濟數據好到無可挑剔，美國的消費信心指數升至五年新高，中國上周六公布之十月份出口增長11.6%，雖然同時承認今年外貿難保10，但已不能苛求。

上周五公布之CPI、PPI、固定資產投資及零售數據均全部好過預期，奈何股市被美國「財政懸崖」拖後腿，但對長線投資者而言，可能是低吸的好機會。

港股陪美股「跳崖」，而且係笨豬跳，恒指上周五再跌182點，插穿上月底低位，仲一口氣殺入牛仔重貨區，下個支持位要睇21,000點關口。不過，國企指數走勢冇咁差，低位有反彈，而且收陽燭。所以港股跌勢主要目的係殺牛，上周五主板成交縮至576億元，期指則低水70點。

上個禮拜內房股氣氛唔係差，事關唔少公布已實現甚而係超過今年所定嘅銷售目標，消息支持越秀地產（00123）股價創五十二周高，另見恒大地產（03333）走勢亦唔錯，上周五恒指跌百幾點收場，但恒大股價仍能逆市上升，收報3.85元，升1.3%。

史提芬相信，嚟緊中央未必咁快會放鬆內房調控，但相信再大幅收緊嘅機會好微，內房板塊嘅政策風險已見頂，嚟緊股價表現取決於銷售成績及資金周轉速度。選股方面，恒大較啱炒家胃口，中長線持有則建議選龍頭嘅中國海外（00688）同華潤置地（01109）。

近期有關「港獨」的熱門話題是「香港人飲甚麼水？」不需讀過通識科亦知是「東江水」，所以全港市民都要幫襯粵海投資（00270）。該股已成為公用股，而公用股特性通常是大升市時表現較沉靜，但到跌市時則發揮其抗跌功能。粵投更為可愛，早前隨大市升至6.5元新高，上周五稍跌破6元即告反彈，收報6.19元。

粵投抗跌力勝一籌

如果當粵投係公用股，集團預測PE約12倍幾，明顯較2、3、6號仔便宜，較差的是預測周息率約三厘，不及兩電及領匯（00823）。集團除供水之外，亦有物業投資、百貨、發電、酒店及公路等業務，雖然加埋都唔夠「東江水」咁值錢，不過勝在項項業務算穩健。

近期個市嘅「恐慌指數」又再攀升，資金可能回流低風險股票，上周五見穩陣內需股如康師傅（00322）、華創（00291）、恒安（01044）明顯受追捧，進可攻、退可守的粵投，自然值得睇好。