股海實戰：恒安目標睇80元

上周市場焦點由美國總統選舉轉移至「財政懸崖」問題，外圍股市受壓，港股亦高處不勝寒，恒指上周唔見七百多點，好友氣燄受挫，大批牛仔被強制收回。阿莊認為，呢個星期港股走勢頗為關鍵，若然恒指周初完成整固再展升勢，則後市可繼續看好，否則的話，要有心理準備呢個月指數已見高位。

去年內地城市人口首次超過農村人口，意味城市化推進已逐漸取得成效。隨着內地人口平均消費能力不斷提高，消費市場發展潛力龐大。難怪十八大期間相關官員明確表示，未來政府將繼續透過提振內需拉動經濟，包括擴大安全消費、做好錄色消費、提高服務消費、促進品牌消費、培養網絡消費以及提倡信用消費等。嚟緊投資者想分享內地消費市場發展嘅投資機會，選股時可多循呢幾個方向發掘新目標。

講到消費類股份，恒安（01044）堪稱板塊之王。今年上半年，恒安實現純利16.2億元，同比增長37.6%，成績理想，難怪基金愛不釋手。由於個人衞生用品佔總收入比重八成多，木漿乃主要原材料，只要原材料成本控制得宜，毛利率可維持穩定。今年以來受惠原材料價格回落，上半年毛利率上升5.6個百分點，至44.2%。

具產銷規模優勢

據最近大行報告引述恒安管理層指，第三季收入增長及毛利率均優於上半年。阿莊相信，恒安擁有產品質量、品牌以及產銷規模效益等優勢，喺行內手執牛耳，只要原材料價格未有出現大幅波動，盈利前景能見度高，可繼續成為基金投資消費股組合中嘅核心股份。

今年以來恒安股價維持喺68至83元水平上落，現價72.2元，正處上落區支持位，中線70元邊可先落首注，升穿75元再加注，以一三年度預測市盈率22倍計，目標可定在80元，支持位68元不宜有失。此外，公司旗下零食業務亦已具備分拆條件，一旦IPO市場氣氛好轉，或可添加炒作誘因。