樓市出更：高檔名店淹沒漢口道

尖沙咀核心零售圈逐年擴大，繼海防道後，鄰街漢口道近年多咗好多大型連鎖金飾店，同埋售賣時尚服裝與手袋等大租戶，比例差不多佔全條街近半，一改以往全街專賣中價K金，同高爾夫球用品等中價貨品嘅情況，依家個別呎租去到近千元，而平均呎租大約要500元，同兩、三年前比都升咗三成。由於舖位升值潛力高，英皇國際（00163）月前亦一擲約1.45億元購入漢口道地舖。

近幾年國際跨國時裝店及珠寶店，同埋本地連鎖錶行等大租戶攻陷尖沙咀廣東道地舖，唔少大型金行及時尚品牌為爭取靠近廣東道的「大款客」，前幾年起已搶租海防道地舖，而呢幾年海防道舖位盤源大減，加上租金趨貴，好多呢類畀得起錢嘅商戶開始喺漢口道租舖。

專賣貴價貨 吉舖近零

劉Sir計過，依家漢口道地舖約有60幾間，單係大型連鎖金飾店，同時尚服裝及手袋專門店佔近30間，差唔多佔全條街地舖租戶近半。相對四、五年前條街仲有好多港式茶餐廳、高爾夫球用品店、地道港式餅店，及賣K金為主嘅金行等，可謂今非昔比。

有代理同劉Sir講，由於目前漢口道吉舖近乎零，所以租金幾硬淨，成交呎租由400幾元至近1,000元都有，平均呎租約500元，只係比海防道地舖平均呎租平一半，但唔少大商戶都爭住搶位，例如月前有間本地連鎖個人護理產品店，以每月近60萬元承租漢口道單號地下C舖，以面積610方呎計，呎租980元，較前租高35%。

半世紀老店也想出租

喺尖沙咀開舖賣金飾及手錶等貨品超過半世紀嘅珠寶店，其職員同劉Sir講，「好彩自己六十年代已購入漢口道地舖現址自用，如果唔係，依家租金咁貴，做埋唔夠畀租」。佢仲話，如果有商戶有誠意，公司都會考慮租出舖位畀有興趣人士。

但喺尖沙咀工作嘅關小姐同佢朋友陳小姐同劉Sir呻，話依家漢口道舖頭大部分賣貴價貨，部分賣嘅紅酒要成萬元一支，賣嘅衫都要成千元一件，普通打工仔點畀得起，相信條街所剩無幾嘅茶餐廳好快都會被迫遷。

由於漢口道地舖租金升值潛力高，英皇國際月前就以約1.45億元，購入漢口道25至29號地下B舖，呎價大約18萬元，租約去到出年，該集團執行董事張炳強話，估計到時新租金可以升逾九成至約35萬元，屆時收租回報近3厘。