激罕潮服 美式兄弟幫

一件Tee加一條Skinny Cut牛仔褲，Roll起褲腳再踏波鞋，最潮的美服配搭莫過於此。09年成立、選址油麻地後街的隱世潮舖Popcorn，多年來都為潮男提供換季新裝，早前更愈搞愈大，由300多呎地舖化身為2,000呎地庫，令潮男又多個私竇可以掃貨。它的幕後旗手正是《Big Boys Club》的主持人阿Bob及其大學朋友奇寶，一個主外一個主內，將罕有潮物引入香港，難怪連不少明星都瞓身支持！

潮舖細變大

香港寸金尺土，一間2,000多呎的舖頭絕對有睇頭，而且裝修還花足心思，由店面的吊燈開始，逐步走入地庫會看到刻意舊化的木地板、由美國搜羅回來的釀酒桶、木製船舵及三輪單車等等，整體裝潢帶有濃烈的美式風格，奇寶表示：「雖然Popcorn坐落在油麻地港鐵站旁，交通位置極佳，但以前受面積所限，很多貨品都未能放出來。隨住生意上軌道，今年4月我們一擲7位數字，把原先用作貨倉的地庫重新修葺，貨放多啲，客人揀衫亦更舒服。」奇寶更謂，新舖由設計到材料他都一手包辦，裝修期間壓力爆煲，曾找過阿Bob哭訴，猶幸出來的效果滿意，也足見兩人合作無間。

入股買保障

店名叫「Popcorn」（爆谷），奇寶指沒有特別意思，純粹因為鍾意，而「鍾意」二字亦是3年前的開舖主因。「我大學讀時裝，但畢業後卻開廣告公司，公餘都會搞吓時裝開倉，慢慢發覺自己鍾意Fashion遠多於廣告，便膽粗粗於09年4月開舖。」至於阿Bob，則原來是奇寶大學時期認識的好友，兩年前想投資，便決定以6位數字入股，正式成為Partner。阿Bob認為：「做藝人花無百日紅，冇可能做主持做到老吧！我本身有買樓買股票，入股是更長遠投資，希望給將來多一份保障。」

飛美國入貨

奇寶自小鍾愛美國品牌，Popcorn自然以美國潮服做主打，目前主力賣Levi's及Dickies，前者美版較多，售價比行貨稍平；後者則連行貨沒有的日版也引入，部分更是舊版兼Deadstock（絕版）款式，絕對罕有難尋。惟回想最初，入貨才是一大難題︰「我初入行咩都唔識，部分牌子冇香港代理，初期成日要飛美國入貨，但唔係問代理攞，而係去超市買。買得多店員認得唔肯再賣畀我，我就惟有等交更時再買，真係吃盡苦頭。」不過所謂先苦後甜，現在Popcorn已經是Dickies在港的指定分銷商，有齊行貨衫褲背囊，入冬換季必掃。

引入本地薑

取得分銷資格，奇寶亦不忘擴充貨源，多年來先後引入Start From Zero、Pony、Manhattan Portage、New Balance、Eastpak等牌子，當中Start From Zero更來自香港。「我入貨主要是看品牌能否與我們的美式風格互相配合，若他們只有一兩件貨OK但沒有靈魂，我也不會選擇。」奇寶補充，他一直很欣賞Start From Zero，惟細舖時沒有空間擺放，現在擴充了自然大力宣傳，「我希望能為本地時裝界出一分力，透過增加銷售渠道助他們成長！」如此有心，難怪不少牌子都主動來敲門。

明星都捧場

整個訪問中阿Bob意見不多，問到營業情況時更往往把問題往奇寶處推，但不要以為他扮Cool不答，因為這正是兩個人分工清晰之故。奇寶主內，負責入貨、裝修、管數及招聘；阿Bob主外，負責找媒體及藝人朋友宣傳，而經他介紹，森美、Mr.鼓手Tom、周國賢及恭碩良等都是捧場客。「有時我落舖影張相放上微博，又或者拍攝時着番舖頭衫，其實已起到軟性宣傳；加上我份人夠親和，生客落到嚟都唔覺得陌生。」拍攝當日所見，的確有不少途人跟阿Bob合照後再入店選購，宣傳效果不可小覷。

明年開分店

生意漸上軌道，利潤日增，可有進一步發展藍圖？「之前我們有想過開分店，甚至想過夾份搞飲食，但近期市場太過波動，希望聖誕、新年等傳統銷費旺季，營業額能有所提升。」阿Bob寄望明年把計劃付諸實行，選址首選沙田，其次是新界其他地方，「雖然現在舖頭毗鄰港鐵站，人流暢旺，但租金開支大；相反新界租金稍低，而且可吸引新客源，潛力不俗。」

營業資料

總營業額︰$580,000

租金︰$200,000

入貨︰$250,000

人工︰$100,000

雜費︰$10,000

盈利︰$20,000