股海實戰：頁岩氣股睇位落注

奧巴馬成功連任，此前一直做好嘅美股好似完成任務咁款，道指前晚唔見三舊，尋日恒指最低見21,555點，收報21,566點，跌532點，成交728億元，扣除銀河（00027）有大手上板，大市成交仍有600多億元。跌市成交唔細，且唔少近期表現偏強嘅股份亦開始出現較大沽壓，若短線未見似樣反彈，就要及時減磅為妙。

十八大召開，但A股表現卻令人失望，滬綜指尋日收市跌逾1.6%。港股呢期持續跑贏A股，但若然年底前A股尚未見大起色，港股表現能再拋離A股有多遠？熱錢是否持續流入港股成關鍵。

尋日見個市咁跌法，加埋隻中傳動（00658）股價又未肯再去，遂以均價2.8元沽出5萬股，執四舊夠去飲餐茶﹗隻港交所（00388）短線上唔番10日線128.8元亦會考慮睇位落車。

大市調整，市場焦點轉移，尋日華能新能源（00958）、大唐新能源（01798）及中國風電（00182），升幅介乎3至11%。繼續睇新能源板塊，兩隻頁岩氣概念股表現堅挺，所指嘅係安東油服（03337）及華油能源（01251），前者升0.38%，後者升7%。

安東油服佳績可期

尋日華油表現出眾，主要係公司披露，與美國燃氣技術研究院GTI訂立無約束力框架合作協議，從而建立長期合作關係。眾所周知，中國嘅頁岩氣蘊藏量雖多，但開發技術卻大大落後美國，開採成本高昂。今次華油能夠搵到有七十年歷史嘅美國同行合作，當然係好事。

至於安東，早前經已預告第三季中標多份重大合同，第四季會係執行工作量嘅高峰期，意味下半年佳績可期。以現價計，安東同華油嘅一二年度預測市盈率都係唔到廿倍，仲未計國家頁岩氣補貼政策所帶來嘅發展機遇。雖然十月以來呢兩隻股股價已累升五成，但阿莊聽聞班芬佬仲係信心十足。反正呢期市況調整，阿莊認為不妨先觀察安東喺2.4元及華油喺2.2元水平嘅承接，再睇位落注。