樓市出更：新盤無打殘兩周賣四百伙

政府推出兩項「辣招」令樓市交投急轉靜。不過，劉Sir睇番發展商喺網上公布嘅成交紀錄數據，同埋市場收到嘅風，其實呢兩個星期，一手交投又唔算好差，加加埋埋都有超過400宗成交，賣得最好嘅係恒地（00012）嘅元朗尚悅，佔咗成交量約莫330宗，而信置（00083）嘅大埔天賦海灣同埋2期溋玥．天賦海灣，出招後加埋都有十幾宗成交。

劉Sir睇番尚悅網上公布嘅成交紀錄，出招後已經有約莫330宗成交，其中300幾、400萬元嘅單位最搶手，代理話，呢個盤可以話係今年下半年以嚟，開售價最平嘅新盤，所以吸引唔少「上車客」入市。

呢批客話唔介意加強版額外印花稅（SSD）要綁三年，因為反正都係自用，佢哋反而最擔心係呢次上唔到車，蘇州過後無艇搭，日後要搵400萬元樓下嘅大型屋苑上車可能再無機會。

尚悅尋日都賣咗兩間，分別係8座19樓J室同11座17樓F室，成交價為441萬元同逾360萬元，平均呎價7,300幾元。

除咗上車盤尚悅，同系馬鞍山迎海出招後亦都做咗約莫15宗一手成交，雖然成交嘅逾1,000萬元單位無之前咁多，不過，期內零零星星嘅成交都有兩、三宗。

溋玥溱岸頻錄成交

至於信置嘅大埔溋玥．天賦海灣，出招後成交咗8宗，樓價講緊1,100萬元去到接近1,700萬元，同系1期天賦海灣，反而出招後多咗3,000幾萬元成交，過去兩周錄得嘅5宗，有三宗成交係3,000萬元以上。另新世界發展（00017）嘅沙田溱岸8號都有12宗交易，最貴嗰宗講緊5,400幾萬元。

另外，黃大仙現崇山可能係現樓關係，出招後成交都維持穩定，兩周累積有12宗成交，尋日都有開單，中原張汝智同劉Sir講，買家本身係住開呢區嘅香港人，所以情有獨鍾揀番呢個盤入市，成交單位為6座高層B室，做價超過1,600萬元，講緊每方呎要1.2萬。

有消息話，港島區一個新盤亦首錄BSD（買家印花稅）成交，該單位成交價約2,000萬元。