樓市出更：九肚西貢地破頂無望

今季推出嘅沙田九肚豪宅地及西貢沙角尾限量地，落實本月三十日招標，不過政府新推買家印花稅（BSD）痛擊豪宅市場，豪宅地首當其衝被看淡。有測量師老友話，新政策對豪宅影響大，市場估計九肚地皮樓面地價最低約9,000元，較五月批出同區最貴地皮低近15%，兩地估值合共最高約36.62億元。

地政總署公布，上述嘅沙田九肚第56A區B1地盤豪宅地及西貢沙角尾限量地，會喺本月三十日招標，截標日期係明年一月四日。

其中沙田九肚地可建總樓面約14.2萬方呎，高緯環球張翹楚同劉Sir講，今次政府出招對豪宅市道影響較大，而且沙田九肚未來供應「排住隊出」，故今次呢幅九肚地呎價未必可以再次突破1萬元，樓面地價料約9,500元，估值約13.53億元。而睇得最淡係美聯估計樓面地價約9,000元，目前市場估值由約12.8至14.2億元。

九肚樓面呎價睇九千

劉Sir知道，沙田九肚係政府力谷供應主力地區之一，其中B5地盤喺今年五月以區內最高呎價10,551元批出，其後八月底售出嘅同區B3及4地盤，樓面地價亦達約9,551元。估計今次招標嘅B1地盤呎價有機會進一步回落至約9,000元，即較五月批出嘅B5地盤呎價低近15%。

至於西貢沙角尾地皮則須作限量發展，地盤面積約16.6萬方呎，較最初公布參數略為縮減約1,800方呎，最新總樓面大約24.9萬方呎，項目規定要提供不少於240個單位，即係可以起到平均面積逾千方呎嘅大單位。

張翹楚話，西貢沙角尾好耐無地皮推出，但對比舊年十月批出嘅西貢甲邊朗低密度豪宅地呎價達約14,741元，今次沙角尾地皮做價就一定無咁高，因為地皮地積比率有1.5倍，又有限量條款，再加上市場氣氛受新辣招影響，地皮估值料約22.42億元，樓面地價約9,000元。

劉Sir估計喺沙角尾有地盤嘅新世界（00017）對呢幅土地競投意欲會較強。