股海實戰:神州數碼掀新升浪

熱錢湧港,估計截至上周五金管局已前後入市注資約300億元。魚缸水頭充足,恒指勢如破竹,上周五收報22,111點,乃去年八月初以來嘅收市新高。睇形勢,短線回吐守住21,800至22,000點區域,將有更多資金跟上車。不過,本周中、美政治大事都會有結果,之後維穩動機消失,後市波動性可能會擴大,投資者入市最緊要係量力而為。

阿莊揸住嘅國壽(02628)上周五見過23.9元,維持睇五十二周高位24.7元。上周五推介嘅港交所(00388)高開見130元後,最高見過131.5元。阿莊以均價15.2元沽出昆侖(00135),賺3.1萬元,然後以均價130.6元買入2,500股港交所(00388),另以均價2.46元買入50,000股上周三推介嘅波司登(03998)。

英皇鐘錶值得關注

香港十月份零售數據表現勝預期,奢侈品股被炒起,見亨得利(03389)、周大福(01929)、景福(00280)同周生生(00116)上周五股價均升一成,六福(00590)及東表(00398)同升8%,料本周炒作未完,英皇鐘錶(00887)價細兼落後,可以(目及)實。

此外,人仔升值概念股中,航空股升得太慢,都係睇番隻神州數碼(00861)。呢期祖國開Turbo興建鐵路及城軌等基礎建設,神數嘅「智慧城市」發展策略正合時宜,未來圍繞市民卡嘅營運模式發展潛力大,除咗應用喺市民服務之外,還包括衞生訊息、食品藥品溯源、數據交換及運輸等領域。

神數截至今年六月底止首季度錄得純利4億元,同比增12%,手頭現金等值有41億元,現價預測市盈率約10倍,估值仲係平,加埋有人仔升值概念,上月中旬股價升穿250日線後現回吐,整固兩周後,上周五以大成交重上該線之上,收報14元,升4.7%,料可確認展開新升浪,首站目標定喺15.5元,250日線及10日線支持喺13.3元。

阿莊

內地積極興建城軌鐵路項目,神數的智捷城市策略發展潛力龐大。(資料圖片)