樓市出更：福佬村道舖鑊氣沖天

自從舊機場搬走後，九龍城有愈來愈多中產一族進駐，吸引星級酒店餅店等承租能力高嘅商戶進駐，帶動租金上升；代理話，最為顯著莫過於福佬村道，呢幾年新簽地舖平均呎租去到大約50元，拍得住深水埗福華街一線地舖呎租。投資者「物流張」又點會唔知九龍城商舖有得炒，近月共斥近半億元掃入三個舖位，全部速賺錢摸出。

近幾年九龍城有多個新盤入伙，加埋差唔多成千個單位，當中住客唔少仲係花得起錢嘅中產一族，好多高檔食肆都睇準機會進駐，帶動租金上升。由於區內聯合道兩旁不准泊車，食客難泊車惠顧；而衙前塱道至城南道一帶以賣平價日用品為主，所以承租能力較高嘅特色食店，都會選址聚集喺福佬村道。

半數食店 舖租飆3成

區內代理星譽物業石致威（Eddie）同劉Sir講，成條福佬村道舖頭大約有80幾間，新新舊舊同食有關嘅商戶差唔多佔一半，由於條街唔少商戶係賣貴嘢店舖，現時平均呎租大約50元，與同街一、兩年前舖租比較，升咗大約30%左右。另外，有老友話，福佬村道地舖平均呎租同太子花園街地舖仲有啲距離，不過，已經同福華街靚位店舖租金差唔多。

而喺福佬村道鄰近KCP九龍城廣場開業嘅星級餅店酒店，負責人王小姐同劉Sir講：「公司睇準九龍城愈來愈多高消費群，加上唔少客人都喺九龍塘揸車嚟幫襯，所以公司決定續租，佢仲話新租金升咗唔止一倍，幾多錢就唔講得。」

至於隔籬嘅獅子石道就以賣衫褲鞋襪為主，有間喺區內開業賣衫超過半世紀嘅舖頭，老闆娘潘太話：「近幾年九龍城多咗好多新商戶進駐，帶動租金上升，好彩自己多年前買咗獅子石道50號地下現址，面積3,000幾方呎，如果唔係，依家我哋有機會要捱貴租。」

有區內代理問過啲業主，佢哋都話福佬村道新進駐嘅高級特色食店最畀得起租，以一個800幾方呎地舖計，新租金每月近7萬元，呎租近90元，一般做街坊生意嘅食店都嫌太貴，根本費事再傾，反而上述新進高級店舖覺得租金比市區平，最少都肯同業主傾，有機會減少租金。

物流張摸售3舖勁賺

九龍城地舖租金升值潛力高，投資者「物流張」睇準舖位做價勢必上升，近月先後斥近半億元連環購入三個舖位，亦在短時間內悉數摸出，其中，今年六月以約1,500萬元購入嘅九龍城打鼓嶺道39號地舖，持貨僅兩日速以1,700萬元摸出，帳面速袋200萬元，賺幅逾13%。