Fundman睇市：渣打抵捧場

美國受颶風吹襲，華爾街連續兩日休市。但無市還無市，不能不提美國公司季績，睇番統計數字，標普五百指數裏面，272間公司交出成績表，每股盈利、營業額，又或者兩個數都優於大市估計的，分別佔51%、35%及25%，平均每股盈利幾乎同第二季睇齊，早前大行估計第三季美國上市公司會出現三年來首次季度業績倒退，結果預測落空，看來經聯儲局三輪泵水，美國經濟及企業盈利展望，比大部分賓架估計理想。唔少人估緊今次颶風過後，建築物及基建設施復修將可輕微推高第四季GDP，睇嚟淡友要出手的話，都要搵過第二個藉口。

期指結算日港股靜過鬼，成交460億，是十個交易日以來最低，恒指跌82點，收21,428點，上次三日連跌，已是兩個月前，沽空佔大市成交比例重返一成樓上，見10.53%，是九月廿七日以來最多，淡友蠢蠢欲動，但從偏淡成交可見，等買貨嘅仲係比等沽貨套現的人多，整固後大市仲有條件再升。

尋日渣打（02888）份中期管理層報告，唔少數據幾標青，包括收入維持高單位數增長（上半年9%），意味第三季未被歐洲影響，另外計埋3.4億美元畀紐約州金融局一次過的庭外和解支出，成本與收入比例仲係大致持平，盈利則維持雙位數增長（未計紐約州嗰筆），現價一三年市盈率10.1倍，個人觀感渣打業務表現尤勝滙控（00005），股價仲未重返五十二周高位204元，捧場客繼續跟進吧。

以為二三線調整，唔多唔少拖埋幾隻至愛的燃氣股落水，一心等機會執平貨，點知燃氣股抗地心吸力的能力特強，港華燃氣（01083）月中見過上市新高6.25元後，最多只回到6.03元，尋日百多萬股成交，股價彈番去6.13元，幾乎無跌過。

港華燃氣放心入貨

筆者不止一次提過，「十二五」規劃明言支持全國管道燃氣發展，冀一五年能夠達成全國2,300萬億立方米的燃氣消費量。在傾斜的國策下，中資板塊中，燃氣股幾乎肯定可以保持高增長。

港華上半年賺3.57億，增長18.1%，收入24.37億。集團去年底有68個供氣項目，今年預告增加大約十個新項目，新取得四個項目分別位於遼寧及江西等，捧場客關注的是年底前能否趕及多簽幾個以達標。港華燃氣一三年PE15.6倍，稍低於新奧（02688），上半年售氣增長因為工業燃氣銷量減慢，第四季開始應有改善，6.1元左右應可放心入市。