股海實戰：創科實業乘風而起

颶風襲美，美股休市，日本加大注資規模未能提振人心，港股繼續消化打擊樓市炒風新措施，魚缸冇咩焦點，中資股以燃氣同電力股表現較強，顯示部分資金回流低Beta股。

政府宣布樓市新措施壓抑樓市炒風，地產股利潤不及往時已成鐵一般事實，論估值，信置（00083）嘅下調壓力會較大，較多舊區重建項目嘅恒地（00012）照計唔使睇得太淡。

I.T未具上車誘因

服裝零售股開始陸續公布業績，執筆時見到I.T（00999）份中期業績，期內營業額同比增長23%至29.65億元，其中香港及內地市場分別增長17%及44%；日本市場則成功虧轉盈，錄得經營溢利1,880萬元。期內整體毛利率為59.6%，較去年度嘅61.7%下降2.1個百分點；半年純利降兩成至1.21億元。從存貨周轉日由去年嘅177日增至197天，相信兩地經濟增長放慢對存貨周轉效率造成負面影響，宜觀察下半年是否獲得改善。現價估值中規中矩，加上今次冇派中期息，未具上車誘因。

美國推出QE3，變相對樓市注資，近期數據確有起色，其中九月份新屋銷售數據升至兩年多新高。樓市逐步改善，帶動建築、裝修等周邊企業銷售回升，專營製銷電動工具及地板護理產品嘅創科（00669）自可受惠。近日美國打大風，炒家唔錯失任何炒作機會，藉颶風對美國房屋造成潛在破壞，將帶動相關復修產品銷售，掃起創科，尋日高位曾見14.76元，收報14.36元，逆市升2%，成交1.08億元。

今年上半年，創科純利增長兩成至9,600萬美元，半年純利相等於去年度全年純利嘅63%，負債比率由去年同期嘅66.1%降至37.4%。隨着今年下半年經營環境改善，相信全年度佳績可期，再加上公司中期派息增加35%，全年派息有望提高。上周有大行唱好創科，亦見有基金入場增持，反映大戶取向。再睇股價走勢，九月中以來喺13至14元水平徘徊，尋日初現突破，短線只要企穩10日線13.98元樓上，可繼續向上推進，下一阻力睇15.2元，主要風險乃美國大選後經濟表現及聯儲局退市步伐。